Lajmi për ndarjen nga jeta të Shpat Kasapit ka tronditur publikun shqiptar kudo në Shqipëri, Kosovë, Maqedoninë e Veriut dhe në diasporë. Mes shumë mesazheve të dhimbshme, një gjest simbolik ka ardhur edhe nga këngëtarja me famë botërore, Bebe Rexha.
Artistja shqiptare publikoi një video ku Shpati shfaqet duke kënduar këngë patriotike, një imazh që sot tingëllon si homazh për një artist që i përkiste jo vetëm skenës, por edhe zemrës së publikut.
Në ekran, Bebe shtoi vetëm dy emoji: një pëllumb dhe flamurin shqiptar.
Ajo dhe Shpat Kasapi ndanin të njëjtën tokë të nisjes: shqiptarë nga Maqedonia e Veriut. Ky detaj e bën gjestin edhe më personal, jo vetëm si kolege arti, por si dikush që kupton nga afër historitë, vështirësitë dhe ëndrrat e artistëve shqiptarë të dalë nga i njëjti realitet.
Shpat Kasapi u nda nga jeta në moshën 40-vjeçare, gjatë qëndrimit të tij në Itali, ku sipas mediave fqinje dyshohet se pësoi një atak kardiak. Lajmi i papritur ka lënë pas një boshllëk të madh te familja, miqtë, kolegët dhe publiku që është rritur me këngët e tij.
I lindur më 1 maj 1985 në Tetovë, Shpati vinte nga një familje me traditë muzikore dhe shumë shpejt arriti të bëhej një nga emrat më të dashur të skenës shqiptare. Që nga fillimi i viteve 2000, ai u kthye në idhull për të rinjtë me stilin e tij modern, meloditë e lehta dhe energjinë në skenë. Këngë si “A më do?”, “Valle Kosovare”, “Dashni pa limit”, “Aroma e saj” dhe shumë të tjera, janë ende sot pjesë e kujtimeve sentimentale të një brezi të tërë.
