Kur Maggie Gyllenhaal nisi të mendonte se cilën aktore do të zgjidhte për të interpretuar Marilyn Monroe-n e re në filmin e saj të shkurtër “Flesh Impact”, që do të debutojë në Festivalin e Filmit në Venecia në nder të 100-vjetorit të lindjes së Monroe-s, ajo e kishte menjëherë të qartë emrin: Dakota Johnson.
Gyllenhaal, e cila këtë vit është edhe presidente e jurisë së Festivalit, ka zgjedhur dy aktore për të interpretuar yllin e Hollywood-it në mosha të ndryshme: Dakota Johnson dhe 93-vjeçaren Ellen Burstyn.
Johnson do të luajë Marilyn-in e re, ndërsa Burstyn versionin e saj në pleqëri, një moshë që aktorja e ndarë nga jeta në vetëm 36 vjeç nuk arriti ta përjetonte kurrë.
Edicioni amerikan i Vanity Fair ka publikuar fotografitë e para të të dyja aktoreve në rolet përkatëse.
Gyllenhaal shpjegoi se në fillim kishte hezituar ta zgjidhte Johnson-in, sepse aktorja e “Madame Web” nuk ka shumë ngjashmëri fizike me Marilyn Monroe-n.
“Më pas mendova: ‘Kjo është qesharake. Kujt i intereson?’”, tregoi regjisorja.
“Nuk besoj se dikush e di vërtet se si dukej Marilyn, sepse figura e saj është shfrytëzuar kaq shumë komercialisht dhe është shndërruar në një mit, saqë në mendjen time imazhi i saj është shumë i mjegullt.”
Skenari i filmit të shkurtër, i cili do të zgjasë 17 minuta, është shkruar nga vetë Gyllenhaal.
View this post on Instagram
Gjatë procesit të shkrimit, ajo e kishte vazhdimisht Dakota Johnson-in në mendje.
“Dakota ishte gjithmonë në mendimet e mia. Kur shkruaj, ndonjëherë më ndodh të kem në mendje një aktor që vazhdon të më rikthehet dhe më duhet pothuajse ta largoj me vetëdije, në mënyrë që të mos kufizoj atë që po krijoj.”
Filmi eksploron një pyetje imagjinare: çfarë do të kishte ndodhur nëse Marilyn Monroe do të kishte jetuar edhe 60 vjet të tjera?
“Çfarë do të ishte ndryshe në punën që do të bënte sot?”, pyet regjisorja.
“Ky film është një ndërthurje mes Marilyn-it dhe idesë sime për të”, shpjegoi më tej Gyllenhaal, e cila ka drejtuar “The Lost Daughter” në vitin 2021, film i nominuar për tri çmime Oscar, dhe “The Bride!” në vitin 2026.
“Në shumë mënyra, ky film flet për Marilyn-in, por edhe për aktoret në përgjithësi dhe për atë që do të thotë të kesh atë profesion të çuditshëm, i cili të bën njëkohësisht shumë të brishtë dhe shumë të fuqishëm.”
Për çfarë flet “Flesh Impact”?
“Një grua e moshuar dhe misterioze paraqitet në një audicion për një shfaqje në një teatër të vogël eksperimental në Nju Jork”, thuhet në sinopsin e publikuar nga Festivali i Filmit në Venecia.
“Ndërsa përshkruan aftësitë dhe përvojën e saj si aktore, dalin në sipërfaqe sekrete mbi identitetin e saj, si edhe paragjykimet që kanë shoqëruar jetën e saj.”
Filmi i shkurtër synon të imagjinojë jo vetëm një të ardhme të mundshme për Marilyn Monroe-n, por edhe të reflektojë mbi mënyrën se si aktoret shihen, konsumohen dhe mitizohen nga publiku.