Sot do të mbyllen dalëngadalë të gjitha kategoritë për personazhet e vitit që kanë spikatur në fusha të ndryshme të jetës gjatë vitit 2018. Njëra nga kategoritë është “Këngëtari i vitit”. Fituesi i kësaj kategorie ndoshta pritej, sepse kudo përflitet për të dhe këngët e tij mësohen përmendësh sapo dalin. Besoj e keni kuptuar sepse vetë e keni votuar Flori Mumajesin. Nga 7898 votues, plot 43 për qind e tyre kanë votuar për këngëtarin e hitit “Plas”, “Ja ke bo vetes”, etj. Flori e mbylli 2018-ën më së miri duke u shpallur edhe fitues i Këngës Magjike me baladën “Plas”.
Në vend të dytë renditet një nga zërat më të veçantë të skenës shqiptare. Alban Skënderaj ka mundur të mbledhë 12 për qind të votave, duke u renditur kështu direkt pas Florit. Albani vazhdon prej vitesh të kryesojë listat e këngëtarëve më të mirë shqiptarë.
Ndërsa në vend të tretë, por jo më pak i rëndësishëm është një yll i skenës shqiptare. Jo më kot kemi shkruar yll, sepse emri i tij është Ylli Limani. Me një diferencë përqindjeje shumë të vogël, Ylli ka siguruar 11 për qind të votave.
Pra, kjo është rënditja një flori bashkë me një alban që shëndrijnë si një yll.
