Kanë kaluar shtatë vjet që nga 29 dhjetori i vitit 2013, kur një aksident i tmerrshëm në ski ndryshoi jetën e Michael Schumacher. Super kampioni i Formula 1 ishte duke skijuar me djalin e tij Mick, atëherë 14 vjeç, në malet e Meribel, në Alpet Franceze, kur ai u rrëzua duke goditur kokën kundër një shkëmbi. Ai u transportua me urgjencë në spitalin në Grenoble, u operua dhe më pas u fut në koma farmakologjike. Qëndroi atje për gjashtë muaj, përpara se të transferohej në një qendër rehabilitimi në Lozanë dhe më pas në vilën e Gland, gjithashtu në Zvicër, gjithmonë i ndjekur nga një ekip mjekësh të specializuar.
Gruaja e tij Corinna gjithmonë ka mbajtur konfidencialitetin maksimal për gjendjen e tij shëndetësore. Luca Badoer, ish-pilot i Ferrarit dhe një mik i ngushtë i familjes Schumacher, foli për këtë temë:
“Është një dramë që më dhemb kur e mendoj. Por për respekt për Schumi dhe të gjithë familjen e tij, unë nuk kam zbuluar dhe as nuk do të them një fjalë të vetme rreth gjendjes së tij,” -tha ai për Libero. “Vetëm unë, Todt dhe disa miq të ngushtë do ta vizitojmë. Michael gjithmonë është stërvitur fort dhe është mirë që fiziku i tij është ngritur në këmbë. Kur u përpoqëm në provat në Mugello dhe Monza, gjatë pushimit, ai u stërvit në palestrën Technogym ose merrte biçikletën e tij dhe pedalonte nëpër kodra. Michael është Michael! Ai është një luftëtar dhe shpresoj të shërohet shpejt”.
Bashkëshortja e Schumacher, Corinna merr vendimet se kush mund ta takojë dhe kush jo Michael dhe lejon vetëm një numër të vogël miqsh. Sipas ish-menaxherit të Michael Schumacher, Willi Weber, Corinna ka mohuar kërkesat e tij pët një vizitë.
Duke folur për RTL, ai tha: “Unë e di që Michael është dëmtuar rëndë, por fatkeqësisht nuk e di çfarë përparimi bën me rehabilitimin. Do të doja të dija si po shkonte dhe të shtrëngoja duart ose t’i prekja fytyrën. Por fatkeqësisht kjo është refuzuar nga Corinna. Ajo ndoshta ka frikë se unë menjëherë do të kuptoj atë që po ndodh dhe do ta bëj të vërtetën publike."
Corinna Schumacher vazhdon të marrë shumicën e vendimeve për familjen e saj dhe ka fjalën e fundit së bashku me babanë e Michael, Rolf dhe fëmijët e tyre, Gina dhe Mick.
