Pse shumica e rusëve nuk duan të vaksinohen? Teoritë në të cilat ata besojnë

Më shumë se 60% e rusëve thanë se nuk janë të gatshëm të marrin një vaksinë të Sputnik V, dhe rreth i njëjti numër beson se Covid-19 është me origjinë artificiale. Këto janë rezultatet e një sondazhi të publikuar dje nga anketuesi i pavarur Levada-Center.

Sipas Levada, që zhvilloi sondazhin në fund të shkurtit, 62% e rusëve të anketuar thanë se nuk duan të vaksinohen me Sputnik V. Vetëm 30% thanë se do ta bënin, krahasuar me 38% në dhjetor.

Arsyet kryesore të deklaruara nga të anketuarit kundër marrjes së vaksinës ishin shqetësimet për efektet anësore (37%) ose sepse dëshirojnë të presin derisa të përfundojnë provat (23%). 16% e të anketuarve thanë se "vaksinimi nuk ka kuptim”.

Sondazhi, në të cilin morën pjesë 1,601 persona në 50 rajone, gjithashtu zbuloi se 64% e njerëzve mendonin se teoria se koronavirusi i ri u krijua artificialisht si një armë biologjike ishte më e mundshme sesa origjina e tij natyrore, të cilën e besonin vetëm 23%.

Ekipi i Organizatës Botërore të Shëndetësisë që shkoi në Wuhan të Kinës muajin e kaluar për të eksploruar origjinën e virusit, tha se versioni që virusi doli nga një laborator është "shumë i vështirë të jetë i vërtetë dhe nuk po hetohet më tej".

Përshtatur nga CNN