Edhe pse është mik i ngushtë me Anna Wintour, Tom Ford kritikon ashpër veshjet në Met Gala

Tom Ford mund të jetë një nga miqtë më të ngushtë të Anna Wintour, por ai ka disa fjalë të ashpra për Met Gala.

"Është kthyer në një festë kostumesh," tha Ford për ish-redaktoren e New York Magazine, Amy Odell, në një fragment të librit të saj të ardhshëm, “Anna: The Biography", botuar nga Time të hënën. “Dikur ishin njerëz shumë elegantë që mbanin rroba shumë të bukura duke shkuar në një ekspozitë të shekullit të 18-të. Nuk duhej të dukeshe si në shekullin e 18-të, nuk duhej të visheshe si hamburger, nuk duhej të arrije me një furgon ku qëndroje në këmbë sepse nuk mund të uleshe pasi kishe veshur një llambadar."

Imazhet e hamburgerit dhe llambadarit sigurisht që mund t'i referohen vetëm një personi: Katy Perry, e cila mbërriti në shkallët e Muzeut Metropolitan të Artit në vitin 2019 e veshur si një llambadar me përmasa të mëdha dhe pasi hyri brenda, u shndërrua në një kostum hamburgeri.

Edhe Kim Kardashian mbërriti me furgon në ngjarjen e vitit 2019, sepse nuk mund të ulej për shkak të veshjes së ngushtë dhe delikate.

A e shqetësojnë Wintour veshjet gjithnjë e më të çuditshme dhe jopraktike? Me sa duket jo.

“Është ajo pjesa angleze e saj. Asaj i pëlqejnë festat me kostume”, tha mikesha e Wintour, Lisa Love, për Odell.

Pavarësisht kësaj, Ford do të rikthehet si i ftuar për ngjarjen e muajit të ardhshëm, tema e së cilës është "Në Amerikë: Një Antologji e Modës".