Toblerone nuk mund të pretendojë më se është prodhim zviceran dhe duhet të ndryshojë logon

Baret Toblerone, të shitura në mbi 100 vende, nuk mund të quhen më çokollatë zvicerane sepse pronari amerikan i markës po zhvendos një pjesë të prodhimit jashtë Zvicrës.

Imazhi i majës së malit Matterhorn do të hiqet nga paketimi i Toblerone pasi një pjesë e prodhimit të çokollatës do të zhvendoset jashtë Zvicrës, gjë që bie në kundërshtim me ligjet e marketingut në lidhje me përdorimin e ikonografisë zvicerane.

“Për arsye ligjore, ndryshimet që po bëjmë në prodhimin tonë nënkuptojnë se ne duhet të rregullojmë paketimin tonë në përputhje me legjislacionin zviceran. Ne e kemi hequr simbolin tonë për Zvicrën nga pjesa e përparme e paketës së Toblerone", tha një zëdhënës i Mondelez për CNN.

Mali, maja pothuajse simetrike e të cilit pasqyron formën e çokollatës, do të zëvendësohet me një pamje më të përgjithshme alpine, tha Mondelez, kompania që zotëron markën. Mondelez njoftoi vitin e kaluar se nga fundi i vitit 2023 do të zhvendosë një pjesë të prodhimit në fabrikën e saj në Sllovaki.

Legjislacioni zviceran i prezantuar në vitin 2017 kufizon përdorimin e kryqit të bardhë të flamurit kombëtar në një sfond të kuq, si dhe treguesve të tjerë të origjinës zvicerane, në ushqime, produkte industriale dhe shërbime.

Që produktet ushqimore të tregtohen si "të prodhuara në Zvicër", 80% e përbërësve të papërpunuar duhet të merren nga vendi dhe shumica e përpunimit të bëhet atje. Për qumështin dhe produktet me bazë qumështi, kuota e kërkuar është 100%, me përjashtim të përbërësve që nuk mund të merren nga Zvicra, si kakao.