Nëse të duket sikur kudo po dëgjon për proteina, me pluhura, bars dhe pije proteinike që të ndjekin nga çdo rrjet social, nuk je vetëm. Por ja ku qëndron e vërteta: shumica e ekspertëve nuk e rekomandojnë që nevojat ditore të proteinës të mbështeten kryesisht te këto “shkurtore”, por te ushqimet e plota.

Megjithatë, edhe të hash gjithmonë të njëjtin burim proteine të lodh. Për këtë arsye, Vogue ka pyetur trajnerë, themelues palestrash dhe nutricionistë si e mbushin ata përditë “kuotën” e proteinës pa u mbështetur te pluhurat dhe pijet e dyshimta.

Rob Piela, trajner dhe themelues i Gotham Gym

Dikur vegan, sot jo më plotësisht, Rob Piela, trajner i emrave si Gigi Hadid, vazhdon të mbështetet shumë te burimet vegane të proteinës.

“Disa nga atletët më të mirë në botë janë veganë,” thotë ai. “Ata hanë ushqime si bizele, thjerrëza, qiqra. Pastaj vijnë produktet e sojës tofu, tempeh. Edhe arrat dhe gjalpi i arrave janë burime shumë të mira proteine, edhe pse pak më të larta në yndyrë.”

Këshilla e tij kryesore: mos u fikso vetëm pas proteinës. “Një dietë ‘vetëm proteina’ nuk është e shëndetshme,” shton ai. Balanca mbetet çelësi.

Adena Neglia, MS, RDN, CDN, Brown & Medina Nutrition

Neglia thekson se për balerinët, proteina është thelbësore gjatë provave të gjata: ndihmon në performancë, parandalon dëmtimet dhe mbështet rikuperimin.
“Proteina është e rëndësishme për forcën dhe rikuperimin, por është vetëm një pjesë e ‘tablosë së madhe’,” shpjegon ajo. “Karbohidratet janë burimi kryesor i energjisë së tyre, ndaj flasim gjithmonë për balancën mes karbeve dhe proteinës.”

Që të mos mërzitet me të njëjtat vakte, ajo bën “tweakments” pra, ndryshime të vogla në pjatat ku proteina është në fokus:

-Shton kos grek mbi taco, chili apo bowl me patate për një finish më kremoz dhe më të pasur me proteina
-Përdor edamame të tharë si topping krokant për sallata, supa apo bowl me drithëra
-Mban gjithmonë në ngrirje karkaleca për një burim të shpejtë proteine
-Zgjedh versione “high-protein” të ushqimeve të përditshme: bukë me më shumë proteina, pasta të pasura me proteina, apo përzierje të tërshërës/petullave me proteina
“Rregullimet e vogla parandalojnë lodhjen nga e njëjta pjatë, ndërsa e mbajnë marrjen e proteinës konstante,” thotë ajo.

Saul Choza, instruktor pilates dhe themelues i Winsor Choza Pilates

Saul Choza, i cili trajnon edhe Miley Cyrus, pëlqen të ndërrojë burimet e proteinës: p.sh. mish i grirë gjeli për taco më të lehta, salmon i pjekur, por edhe alternativa bimore.

Ai jep edhe një truk të vogël gatimi për salmonin: “E pjek me lëkurë nga sipër për disa minuta, pastaj e nxjerr, i heq lëkurën dhe e kthen në një ‘chip’ krokant për ta ngrënë bashkë me pjatën. Është i shijshëm dhe shumë klientë e kanë adoptuar këtë mënyrë.”

Kur nuk dëshiron vezë në mëngjes, ai kthehet te:

-Arra dhe kos
-Kombinimi klasik oriz + fasule, që së bashku formojnë një profil të plotë aminoacidesh
“Është perfekt kur dua t’i jap trupit pushim nga mishi, peshku apo shpendët,” thotë ai.

Dani Coleman, VP e Training te Pvolve
Dani Coleman beson fort te pregatitja e vakteve:

“Meal prep jo vetëm kursen kohë dhe para, por të lejon të planifikosh dhe të kesh shumëllojshmëri që të mos përfundosh duke ngrënë të njëjtën gjë çdo ditë,” thotë ajo.

Ajo fokusohet te burimet e proteinës nga ushqimet e plota, të lehta për t’u marrë me vete:

-Edamame
-Vezë të ziera
-Mollë me gjalpë bajamesh
-Kos grek (i preferuari i saj)
“E dua mëngjesin, mendoj se të vendos tonin për gjithë ditën,” thotë Coleman. Një nga mëngjeset e saj tipike:

-Kos grek
-Përzier me gjalpë bajamesh dhe fara liri
-Të hedhura sipër manaferra dhe arra
Të gjitha i përgatit një natë më parë në një kavanoz, gati për t’u marrë me vete në mëngjes herët.

Nëse e ke mendjen te proteinat por nuk do të biesh në kurthin e pluhurave, bareve dhe pijeve “magjike”, këto qasje nga trajnerët e yjeve tregojnë të njëjtën gjë:
baza është ushqimi i vërtetë, planifikimi dhe pak kreativitet në pjatë.