Ndër imazhet më ikonike të botës së modës janë ato nga vitet 2000, ku Mary-Kate dhe Ashley Olsen shihen me Birkin dhe Kelly të Hermès-it tashmë të zbutura, të rrudhosura, me shenja përdorimi; apo Balenciaga City të njollosura me verë. Po ashtu Jane Birkin, e cila vite më parë tregonte pa kompleks përmbajtjen kaotike të çantës që mban emrin e saj. Birkin është pa dyshim një nga çantat më të dëshiruara në botë, por ajo që njerëzit kërkojnë vërtet tek një model kaq klasik është gjithë imagjinata që e rrethon: elegancë, një lloj nonshalance franceze dhe mbi të gjitha, status. Një imazh që një Birkin krejt e re e ka të vështirë ta transmetojë: mjafton të shohësh binjaket Olsen me çantat e tyre pothuajse të shkatërruara për të kuptuar pse gjithnjë e më shumë konsumatorë po orientohen drejt vintage-it dhe second hand-it.

Krahas magjepsjes estetike, ka sigurisht edhe faktor ekonomik: Birkin ka arritur shifra thuajse të paprekshme dhe e njëjta gjë vlen për shumë çanta dhe aksesorë të tjerë luksi, që bëhen çdo vit e më të paarritshëm për shkak të rritjeve të vazhdueshme të çmimeve. Vintage-i dhe second hand-i janë kthyer në portë reale hyrjeje në botën e luksit: kush nis të kërkojë një copë të përdorur për arsye buxheti, shpesh zbulon kënaqësinë e gjetjes së objekteve unike, me një histori po aq unike edhe nëse ajo histori nuk është jetuar personalisht.

Gërvishtjet, goditjet dhe shenjat e kohës mbi një Birkin apo një orë Cartier jo vetëm që nuk shqetësojnë më brezin e ri të konsumatorëve të luksit, por e bëjnë objektin edhe më të dëshirueshëm. Siç raporton Business of Fashion, në Fashionphile kërkimet për çanta të zbehura nga koha janë rritur me 39%, ndërsa shitjet e artikujve pre-owned prej lëkure janë rritur me 15,2% nga viti në vit. The RealReal ka regjistruar një rritje të fortë të kategorisë “as is”, sidomos tek Gen Z dhe Millennial-ët, dhe gjithnjë e më shumë njerëz kërkojnë qëllimisht artikuj me gërvishtje apo madje me inicialet e pronarëve të mëparshëm, aq të shpeshta në Hermès-t e viteve ’50–’70. Kjo estetikë ka mbërritur tashmë edhe në pasarela për Pranverë/Verë 2026: Chanel ka prezantuar 2.55 të buta, të dukshme që kanë “jetuar”, ndërsa Prada Galleria bag me efekt të para-patinuar. «Klientët nuk duan diçka të re, por diçka që duket sikur është e tyra që dje. Vetë e papërsosura është bërë e dëshirueshme», komenton Erica Wright, themeluese e Sourcewhere.

Siç thamë, edhe çmimi bën të vetën: përveç rasteve kur kemi të bëjmë me një model veçanërisht të rrallë ose shumë të kërkuar, një aksesor me disa shenja përdorimi priret të kushtojë më pak se versioni “i paprekur”. Nuk është rastësi që ai që kërkon në platforma si The RealReal dhe zgjedh kategori si “fair” ose “as is”, pothuajse gjithmonë i rendit rezultatet nga më i liri tek më i shtrenjti shenjë e një vëmendjeje në rritje ndaj buxhetit.

Në të njëjtën kohë, paradoksalisht, pikërisht një çantë e “jetuar” mund të përçojë një aureolë edhe më të fortë ekskluziviteti: ai/ajo që e mban tregon se nuk është i/e fiksuar ta mbajë perfekte, sikur të mund ta përdorë pa shumë merak, ose sikur të bëhej fjalë për një objekt që ka kaluar nga dora në dorë, ndoshta i trashëguar nga familja. Kështu, e papërsosura kthehet në një kod estetik dhe social që flet për liri, histori dhe natyrshmëri më shumë se çdo objekt i sapodalë nga kutia.