Këngëtarja Big Mama ka kujtuar publikisht një nga momentet e fundit me Shpat Kasapin, pas ndarjes së papritur nga jeta të artistit, i cili ishte një nga emrat më të njohur të muzikës shqiptare. E ftuar në një lidhje të drejtpërdrejtë në emisionin “Ftesë në 5” me Bieta Sulon, ajo foli me emocion për miqësinë shumëvjeçare me Shpatin dhe zbuloi edhe kërkesën e tij të fundit artistike.
Big Mama tha se e njihte Shpat Kasapin prej vitesh, që nga fëmijëria, duke theksuar se kanë qenë e njëjta gjeneratë dhe se kanë ndarë shumë skena dhe momente së bashku.
“Të gjitha fotot i ka duke qeshur. Nuk ka patur në estradën tonë artist më të buzëqeshur se Shpati. Edhe kur ziheshe me të, ai të kthente përgjigje me buzëqeshje. Ne do të na mbeten kujtimet më të bukura. Unë i them familjes, bashkëshortes, nënës, tezes dhe gjithë familjarëve të Shpatit, Zoti u faltë durimin sa më shumë dhe ta kujtojmë në mënyrën më të bukur.”
E pyetur nga Bieta Sulo për fillimet e miqësisë me Shpatin, Big Mama u ndal te vitet e para në skenë:
“Jemi rritur bashkë, jemi prej një qyteti. Sot më janë kujtuar të gjitha gjërat që kemi kaluar, koncertet, rrugëtimet, të qeshurat, shakatë që kemi bërë. Por më ka ngelur në kokë paraqitja jonë në Festivalin e Fëmijëve në 1997, kemi qenë fëmijë, kemi qenë një gjeneratë, kemi patur dhe prindërit shokë.”
Artistja tregoi se kujtimi më i fundit me Shpatin lidhet me një regjistrim festiv, vetëm dy javë më parë, ku ai kishte një kërkesë të veçantë për të:
“Gjëja e fundit që më ka mbetur në kokë, para dy javësh që ishim në një regjistrim të një programi festiv, sikur e ndjente se do të jetë kjo e fundit e dokumentuar. Më tha a t’a këndojmë bashkë ‘Sajzeza’ meqenëse jemi të dy tetovarë. I thashë ‘do e këndojmë o Shpat’. Kush thonte se ai do të ishte kujtimi i fundit me Shpatin.”
