Këngëtari i njohur shqiptar Shpat Kasapi do të përcillet për në banesën e fundit nesër, të dielën, më 30 nëntor, në Tetovë. Ai u nda nga jeta më 26 nëntor 2025, në moshën 40 vjeçare, duke lënë pas një dhimbje të madhe te familja, miqtë, kolegët dhe te të gjithë ata që janë rritur me këngët e tij.
Sipas njoftimit të familjes, të gjithë ata që duan t i japin lamtumirën e fundit janë të ftuar të marrin pjesë në ceremoninë mortore që do të zhvillohet në Tetovë. Homazhet publike do të mbahen nesër, duke nisur nga ora 11:00, në Pallatin e Kulturës në Tetovë, ku familjarë, artistë, miq dhe dashamirës do të mund të përkulen përpara arkivolit të tij. Më pas, në orën 14:00, do të kryhet varrimi në varrezat e qytetit.
Ndarja e tij e papritur nga jeta ka tronditur mbarë publikun. Shpati përshkruhet nga ata që e kanë njohur nga afër si një zemër e bardhë dhe një shpirt i gëzuar, gjithmonë i sjellshëm, i thjeshtë dhe i gatshëm për të dhënë energji pozitive, si në skenë, ashtu edhe në jetën e përditshme.
Prej vitesh, këngët e tij kanë qenë pjesë e pandashme e dasmave, festave dhe kujtimeve të shumë njerëzve. Publiku do ta kujtojë me këngë që sollën emocion, dashuri dhe nostalgji, si edhe me buzëqeshjen e tij karakteristike që dukej se nuk i mungonte kurrë.
