George Clooney mund të ketë fituar statusin e ikonës hollivudiane, por kjo nuk do të thotë se është krenar për çdo zgjedhje të së shkuarës sidomos kur bëhet fjalë për flokët. Teksa promovon filmin e ri “Jay Kelly”, aktori ka rrëfyer se është ndier i “tronditur” kur është përballur në ekran me pamjet e veta nga katër dekada karrierë, përfshirë edhe periudhën famëkeqe të mullet-it në vitet ’80.
Në “Jay Kelly”, Clooney luan një yll filmi që kthen kokën pas dhe rishikon gjithë jetën e tij profesionale, një rol që ndërthuret qartë me biografinë e tij. Në një nga skenat e fundit, personazhi sheh bashkë me menaxherin një “highlight reel” të karrierës, ku regjisori ka përdorur materiale reale nga rolet dhe audicionet e Clooney-t ndër vite. Aktori ka treguar se nuk ishte paralajmëruar për efektin final: “Herën e parë që e xhiroi, ishte edhe hera e parë që ma tregoi. Ai xhirim është ai që ka mbetur në film”, ka thënë ai, duke shtuar se ta shohësh veten të plakesh në ekran “nuk është e lehtë sidomos kur del me një mullet të keq”.
Filmi, që pritet të shfaqet së shpejti në Netflix, ndjek një aktor që kupton se, për vite me radhë, ka vënë punën përpara jetës personale dhe marrëdhënieve të tij. Paralelisht me temën e filmit, Clooney reflekton edhe për të ardhmen e vet. Ai thotë se nuk mendon për një tërheqje të shpejtë nga skena, sepse natyra krijuese e profesionit i lejon të mbetet aktiv: shprehet me humor se në të ardhmen do të ketë gjithmonë role për “gjyshin që kafshon bukën e butë”, dhe se e sheh veten si kandidatin ideal për to.
Megjithatë, mes projekteve të reja nga filmi me potencial për Oscar te debutimi në Broadway – Clooney nënvizon se prania për fëmijët është prioritet. Ai pranon se si ai, ashtu edhe bashkëshortja Amal janë njerëz shumë të fokusuar te puna, ndaj po përpiqen të balancojnë më mirë ambicien profesionale me kohën në familje. Sipas tij, askush nuk e gjen formulën perfekte, por e rëndësishme është përpjekja dhe fakti që fëmijët ta dinë se për çfarë sakrifice ka qenë puna e prindërve.
Ndërkohë, pavarësisht sikletit me një mullet të hershëm, Clooney duket i gatshëm të përdorë të shkuarën si material jo vetëm për humor, por edhe për një reflektim më realist mbi plakjen në sytë e publikut dhe jetën përtej imazhit të “leading man” klasik të Hollivudit.
