Nga Prada vjen me pala dhe lëkundet nga një grusht i mbledhur që mban zinxhirin e artë. Tek Gabriela Hearst është racionale, gjeometrike dhe kompakte, me dorezë lëkure dhe unaza të mëdha metali. Tek Calvin Klein shfaqet si një vogëlushe me rrjetë metalike, një kuti e vogël për minimumin e domosdoshëm pas mesnatës. Një mijë versione pasarele të të njëjtit koncept: chain bag, çanta me rrip zinxhiri që është kthyer në një must të modës, përtej brezave dhe sezoneve, të paktën që prej kohës kur Gabrielle Chanel e shpiku pothuajse shtatëdhjetë vite më parë.
Sepse pikënisja është ajo, 2.55 me lëkurë të qepur kapitone, e menduar për t'i liruar duart nga sikleti i një pochette. Një gjest femëror dhe njëkohësisht feminist, i një stilisteje që, frymëzuar nga garderoba e murgeshave dhe tufat e çelësave që u vareshin në ije, pati idenë gjeniale të një zinxhiri që mbahej në shpatull. Një coup de génie për kohë të pjekura dhe gra në prag lirie edhe përmes mënyrës së veshjes, i përkthyer më pas në gramatika pa fund stilistike nga një numër i pafund dizenjuesish.
Duke qëndruar vetëm në të tashmen, chain bag shfaqet tek Valentino, që krijon modelin Panthea me punim tashmë të dallueshëm patchwork në nappa me shkëlqim dhe mat, me motiv chevron dhe me një kokë maceje nga arkivat e shtëpisë, të stolisur me kristale Swarovski, të vendosur në skajin e rripit me zinxhir. Tek Chloé, përveç rikthimit të disa ikonave të së shkuarës, mendohen edhe çanta të vogla në formë zemre, të mbyllura me kordelë, për t u mbajtur në shpatull mbi triko të holla ose të gjera, me një “shirit” zinxhirësh shtesë që bien si ujëvarë dhe dyfishojnë efektin stil.
Ka chain bag me frymë rétro tek Marine Serre, Ferragamo apo Vivienne Westwood, në formate që shkojnë nga shopper klasik te bauletto dhe bucket bag, si edhe një varg materialesh nga lëkura te metali, si në rastin e çantës së artë të Rabanne.
Vlera e shtuar, ajo që e ka bindur edhe revistën T Magazine të New York Times ta shpallë chain bag si aksesorin must have të sezonit Vjeshtë Dimër 2025 2026, është pikërisht shumëllojshmëria e përdorimit. Mund të mbahet në dorë, në shpatull, crossbody, ekziston në silueta që kënaqin si fanset e mikro formateve ashtu edhe ato të dimensioneve më të mëdha dhe falë përfundimit metalik ka aftësinë e rrallë t i japë një notë elegante edhe një veshjeje shumë casual. Kjo është arsyeja pse e shohim edhe në duart e yjeve dhe të familjeve mbretërore, si Meghan Markle me Triomphe të Celine, edhe në street style, ku përdoret si truk i menjëhershëm për t i dhënë ton gjithë pamjes.
