Nga Vogue
Prej vitesh, mëngjesi im ishte i njëjtë: bukë e thekur me domate, në stil mesdhetar, shoqëruar me fruta dhe kafe. Kisha hequr dorë nga mëngjeset e ëmbla, sepse më jepnin rritje të menjëhershme të glukozës dhe pastaj rënie të fortë energjie.
Tosti me domate më mbante goxha mirë: më ngopte, më jepte energji dhe ishte rutinë që e doja.
Deri kur një shoqe, që po kalon menopauzën, më tha se ndihej shumë më mirë që kur kishte ndërruar tostin klasik me një mëngjes të pasur me proteina: tërshërë, kos, fara dhe manaferra ose kos grek me granola shtëpie dhe fruta pylli.
Vendosa ta provoj edhe unë për disa javë. Humbja pak peshë erdhi “si pa dashje” dhe gjëja më surprizuese ishte që nuk më mungonte fare buka. Nuk jam fanse e madhe e tërshërës, ndaj versioni im i preferuar u bë: kos grek + granola pa sheqer + manaferra. Sot është mëngjesi im i preferuar dhe, po, ndihem shumë më e ngopur se me tost. Kur e ha, nuk më kap uria deri në drekë dhe nuk kam më atë “pikun dhe rënien” e energjisë që vjen nga karbohidratet që digjen shpejt.
Pse funksionon kos grek me granola?
Për të kuptuar më mirë pse ky mëngjes më bën kaq mirë, fola me nutricionisten Laura Parada.
“Së pari, ky mëngjes jep më shumë ngopje dhe energji më të qëndrueshme gjatë ditës,” shpjegon ajo.
“Kosi grek natyral, pa sheqer, është i pasur me proteina, probiotikë natyralë dhe kalcium, plus minerale që ndihmojnë shëndetin e kockave. Nëse e kombinojmë me granola shtëpie pa sheqer, ku ka arra dhe fara, shtojmë proteina shtesë dhe yndyrna të shëndetshme.”
Tërshëra tek granola është bonus më vete:
-burim i mirë fibrash,
-karbohidrate me përthithje më të ngadaltë,
-të dobishme për tretjen, kolesterolin dhe sheqerin në gjak.
Granola shtëpie, me tërshërë + arra + fara, përmban si fibër të tretshme (si beta–glukanet) ashtu edhe fibër të patretshme, që ndihmojnë lëvizjen e zorrëve dhe një mikrobiomë më të shëndetshme.
Pse një mëngjes i pasur me proteina të ndihmon në peshë dhe formë?
Parada thotë se ky lloj mëngjesi nuk është thjesht i këndshëm në afat të shkurtër, por mund të ndihmojë edhe në menaxhimin e peshës në afat të gjatë.
“Ky është një mëngjes nutricionalisht më i plotë,” shpjegon ajo.
“Proteinat dhe fibrat të mbajnë më gjatë të ngopur, gjë që parandalon ‘pickimet’ pa fund mes vakteve. Arrin në drekë me më pak uri, ha më me vetëkontroll dhe kështu, përgjatë ditës, merr më pak kalori. Me kalimin e kohës, kjo mund të të ndihmojë të humbësh peshë, të përmirësosh përbërjen trupore më shumë masë muskulore, më pak yndyrë.”
Me pak fjalë: nuk është dietë ekstreme, por një rregullim inteligjent i mëngjesit.
