Një nga shoqëritë më të njohura dhe më të dashura në showbizin shqiptar duket se po kalon një moment jo të lehtë. Miqësia shumëvjeçare mes Einxhel Shkirës, Graciano Taganit, Fjoralba Ponarit dhe Argjira Spancës, e cila u forcua sidomos gjatë bashkëpunimit të tyre në emisionin “E Diell”, sipas të gjitha shenjave në rrjet, ka marrë një kthesë të papritur.
Detajet e para janë vënë re pikërisht aty ku sot “flasin” më shumë marrëdhëniet: në Instagram. Syrit të vëmendshëm të ndjekësve nuk i ka shpëtuar fakti se Einxhel Shkira ka bërë një lëvizje të dukshme në profilin e saj: moderatorja ka hequr nga lista e ndjekësve tre miqtë e saj, Gracianon, Fjoralban dhe Argjirën.
Ajo që e bën edhe më interesante këtë situatë është se veprimi duket të jetë i njëanshëm: të tre, sipas të njëjtit vëzhgim, ende e ndjekin Einxhelin dhe e mbajnë në listat e tyre.
Ky zhvillim ka ngritur menjëherë pikëpyetje, pasi katërshja njihej për afërsinë e tyre dhe mbështetjen që i jepnin njëri-tjetrit edhe pas largimit të Einxhel nga “E Diell” për t’u bërë pjesë e “Big Brother VIP”. Për publikun, ata nuk ishin thjesht kolegë, por një grup miqsh që e ruanin lidhjen edhe jashtë ekranit.
Ndërkohë, një tjetër detaj nuk kalon pa u vënë re: Einxhel vazhdon ta ndjekë në Instagram moderatorin Flori Gjini, çka lë të kuptohet se krisja, nëse ekziston, lidhet specifikisht me pjesën tjetër të grupit.
Deri tani, asnjë prej protagonistëve nuk ka reaguar publikisht për ta sqaruar situatën: nëse bëhet fjalë për një debat të çastit, një keqkuptim, apo për një distancim më të thellë dhe përfundimtar të kësaj miqësie që ka zgjatur prej vitesh.
