Nga versionet maksimaliste te ato mikro, nga modelet eterike te ato me më shumë qëndrim: pasarelat Pranverë/Verë 2026 na dhanë një panoramë të qartë për fundet që do të dominojnë vitin.
Edhe nëse ende s’e ke vendosur sa të gjera do të jenë pantallonat që do veshësh në 2026, një gjë duket e sigurt: fundet do të mbeten në qendër të modës dhe do të jenë një nga pjesët ku ia vlen të investosh. Pyetja është: cilin model të zgjedhësh?
Në pasarelat e sezonit, Balenciaga solli një version modern të “fundit të ballos”, Chanel dhe Versace i dhanë jetë sërish fundit në stil këmishë nate (slip skirt), ndërsa Victoria Beckham dhe Tory Burch i dhanë fundit të zyrës një kthesë ultra-cool: me bel të ulët (madje shumë të ulët).
Më poshtë, 7 modelet kryesore të fundeve që do t’i shohim kudo në 2026.
1) Fundi me bel të ulët
Në Pranverë/Verë 2026, shumë stilistë propozuan funde që, pavarësisht gjatësisë, ulen në ijë dhe pozicionohen poshtë kërthizës. Është një estetikë që të kujton “bumster”-at ikonike të Alexander McQueen (koleksioni “Nihilism”, 1993) atëherë në pantallona, sot me një rikthim të rafinuar te fundet.
Victoria Beckham dhe Tory Burch e sollën këtë ide në një version sartorial, duke e bërë belin e ulët jo thjesht “provokues”, por i çlirët, modern dhe subtilisht seksi si një uniformë zyre, por me një frymë tjetër.
2) Fundi i ballos
Kur madhështia e së shkuarës futet në modën e sotme. I gjerë, i bujshëm, me volane ose me volume që të kujtojnë krinolinën: “fundi i ballos” është një nga surprizat e pasarelave 2026.
Ndryshimi i madh? Si vishet. Pierpaolo Piccioli, për Balenciaga, e kombinoi një fund monumental sateni jeshil me një crop top të bardhë super të thjeshtë. Ndërsa te Jacquemus, Deva Cassel u shfaq në Versailles me një shpërthim volanesh të bardhë, të balancuara me një kanotiere minimale të zezë. Elegancë, por pa seriozitet të rëndë.
3) Fundi me nyje
Nyjet nuk dalin kurrë nga moda dhe në 2026 ato shfaqen fuqishëm te fundet. Jo vetëm “fundi-këmishë” (si të kesh lidhur një këmishë rreth belit), por edhe modele me fiqe maxi, drapime dhe lidhje të menduara me kujdes.
Te Chloé, Chemena Kamali u frymëzua nga vitet ’50 për një fund romantik me nyje anash; ndërsa Celine e solli në version mini, me një fiok përpara që i jep look-ut butësi.
4) Fundi prej lëkure
Larg klisheve grunge-punk, por pa humbur energjinë rock dhe sensualitetin: fundi prej lëkure është tashmë një klasik i gardërobës moderne.
I veshur me një këmishë të bardhë, siç e propozuan Saint Laurent (Anthony Vaccarello) dhe Ermanno Scervino, bëhet një alternativë më “e fortë” dhe më e guximshme ndaj fundeve klasike të zyrës.
5) Mikrofundi
Nëse 2026 do të jetë viti i mikrofundit, shumë e lidhin këtë me Jonathan Anderson, i cili e bëri atë një pikë kyçe në debutimin e tij si drejtor kreativ i Dior.
Jo thjesht mini, por mikro. Në denim blu klasik, në lëkurë, ose në nuanca rozë pluhur e kaki, me skaje të papërpunuara ose të “sfranguara”. Cool, praktik,… dhe me shumë gjasa, tashmë në “wishlist”-in e shumëkujt.
6) Fundi slip (si këmishë nate)
Pas rikthimit të fortë në 2023-2024, estetika e viteve ’90 vazhdon: feminitet i qetë, i nënkuptuar, jo i zhurmshëm.
Në 2026, slip skirt vishet si ditën ashtu edhe natën. Edhe Chanel e konfirmoi këtë, me Matthieu Blazy që propozoi versionin e tij, duke rishkruar kodet e fundit klasik tweed të shtëpisë.
7) Fundi “vitaminë” (ngjyra të forta)
Edhe nëse ngjyra Pantone e 2026 përmendet si “Cloud Dancer” (një gati “jo-ngjyrë”), realiteti i pasarelave thotë diçka tjetër: 2026 do të ketë tone të forta, të ngopura, të vendosura, sidomos në stilin color block.
Edhe fundet hyjnë në këtë valë: The Attico solli një fund laps rozë “karamele”, ndërsa Willy Chavarria propozoi një fund midi në të verdhë të ndezur, të kombinuar me këpucë dhe geta blu pastel. Mesazhi? Mos ki frikë të dalësh nga zona e rehatisë.
