Dimri është stina e “letargjisë” dhe jo vetëm për arinjtë. Ditët e shkurtra, më pak dritë, të ftohtit dhe më pak aktivitete në ajër të pastër na shtyjnë të rrimë më shumë brenda. Po të shtosh edhe “winter blues” (uljet e humorit sezonale), që shpesh na çojnë drejt ushqimit si ngushëllim, është e kuptueshme pse kontrolli i peshës bëhet më i vështirë.

Në fakt, disa kilogramë shtesë në këtë periudhë janë pothuajse të zakonshëm: një studim ka vërejtur se nga mesi i nëntorit deri në mesin e janarit, të rriturit në vendet perëndimore shtojnë mesatarisht rreth gjysmë kilogrami. Çfarë mund të bëjmë? Të zbatojmë disa strategji të thjeshta, si në dietë ashtu edhe në stil jete, që na ndihmojnë të dalim nga “letargjia” – nëse jo më në formë se kurrë, të paktën në formën tonë normale. Sepse dimri mund të jetë edhe një shans për t’u kujdesur më shumë për veten.

12 këshilla për të mos shtuar peshë në dimër
1) Ule kripën në tavolinë
Shpesh konsumojmë më shumë kripë seç duhet pa e kuptuar jo vetëm nga ajo që hedhim vetë, por sidomos nga ushqimet e përpunuara. Në dimër, bëj kujdes me sallamet/kolbasët, ushqimet e paketuara dhe mëso të lexosh etiketat.

2) Lejoji vetes një “ëmbëlsirë” të shëndetshme
Është mirë të ulësh sheqernat, por dimri ka nevojë edhe për pak “comfort food”. Zgjidhja është masa: një copë e vogël çokollate e zezë mund të të ndihmojë edhe me humorin, edhe me dëshirën për të ëmbël.

3) Lëviz sa më shumë (edhe me gjëra të vogla)
Në fund, gjithçka lidhet me bilancin: kalori të marra vs. kalori të djegura. Ngjitu shkallëve, ec në këmbë kur mundesh, bëj një xhiro të shpejtë në pauzë (power walking). Krijo një rutinë edhe 10–15 minuta në ditë: yoga, pilates, kërcim, HIIT, kardio. Ndërro llojet e stërvitjes: kardio + forcë + fleksibilitet, që të mos biesh në monotoni.

4) Praktiko “mindful eating” (të ngrënit me vetëdije)
Dimri lodh edhe mendjen: stresi dhe pagjumësia rrisin urinë dhe “ngrënien emocionale”. Në vakte, ha më ngadalë, përqendrohu te ushqimi dhe përtyp çdo kafshatë mirë (20–30 herë, siç këshillojnë shumë specialistë). Kështu e kap më shpejt sinjalin e ngopjes dhe ha më pak pa e vuajtur.

5) Zgjidh “whole foods” – ushqime sa më pak të përpunuara
Mbush pjatën me perime/fruta sezonale, vezë, mish e peshk të freskët, bishtajore, drithëra integrale, arra e fara. Përdor vajra jo të rafinuar (p.sh. vaj ulliri). Syno që gjysma e pjatës të jetë perime. Shto proteina në çdo vakt: treten më ngadalë dhe të mbajnë më gjatë.

6) Kalo te drithërat integrale
Makaronat dhe buka integrale japin më shumë fibra, ndihmojnë të shmangësh rritjet e forta të sheqerit në gjak dhe zgjasin ndjesinë e ngopjes.

7) Përdor erëza
Ushqimi i shëndetshëm s’do të thotë pa shije. Kurkuma, qimnoni, xhenxhefili, majdanozi, borziloku, koriandra i japin aromë dhe i bëjnë vaktet më të kënaqshme. Speci djegës ka kapsaicinë që mund të nxisë metabolizmin. Për kos/muesli/porridge, përdor kanellë: disa studime e lidhin me menaxhimin më të mirë të glukozës.

8) Kontrollo porcionet
Truku më i thjeshtë: përdor pjata më të vogla. “Bowl”-et janë zgjidhje e mirë, por jo ato gjigante. Një “bowl” me shumë ngjyra e përbërës të ndryshëm të kënaq edhe syri, edhe stomaku.

9) Kujdes me snack-et, sidomos kur rri në shtëpi
Kur je në shtëpi + dita e errët + frigoriferi afër = snack-e pa fund. Nëse do patjetër diçka, zgjidh opsione të lehta: perime me hummus, mollë/dardhë me pak gjalpë arror, një grusht bajame/fara, kos i lehtë me fruta, ose kefir.

10) Shiko çfarë pi
Shumë kalori të dimrit fshihen te pijet: jo vetëm te pijet me sheqer, por edhe te “të shëndetshmet” e gatshme (lëngje të paketuara, kos i pijshëm me sheqer, pije sportive). Pa folur për alkoolin e festave. Zgjidh çajra, tisane, dhe nëse do lëng, më mirë i freskët.

11) Hidratohu
Edhe në dimër trupi ka nevojë për ujë. Uji, çaji, tisanet por edhe supat ndihmojnë hidratimin. Shpesh “uria” është thjesht sinjal për mungesë lëngjesh.

12) Kujdes gjumin
Gjumi i dobët rrit grelinën (hormoni i urisë) dhe të shtyn drejt ushqimeve më kalorike. Strategji të thjeshta: fli në të njëjtën orë, mbaj temperaturë të përshtatshme në dhomë dhe largo ekranet të paktën 1 orë para gjumit. Do ta ndjesh edhe në energji, edhe në oreks.