Përplasja publike mes klinikës private “Vera–VIRHOV” në Tiranë dhe blogeres Eliona Pitarka ka kaluar zyrtarisht në rrugë ligjore. Klinika ka bërë të ditur se ka depozituar padi ndaj Pitarkës, duke e akuzuar për shpifje, fyerje, dëmtim të imazhit dhe shkelje të ligjit, pas një serie postimesh dhe kundërpostimesh në rrjetet sociale.
Sipas klinikës, debati nisi pasi ajo pretendon se Pitarka ka shpërndarë në rrjete sociale dieta për fëmijë dhe informacione shëndetësore, duke përdorur emrin e pediatrit Dr. Edi Tushe. Klinika thotë se ka reaguar me paralajmërime publike dhe se përplasja vijoi më tej në Instagram, ku palët shkëmbyen deklarata dhe akuza.
Në një deklaratë zyrtare, klinika thekson se ushtron aktivitetin prej më shumë se 20 vitesh dhe se e ka ndërtuar reputacionin mbi profesionalizëm, etikë mjekësore dhe respekt për shëndetin publik. Po ashtu, liston disa nga mjekët e stafit, duke e konsideruar ekipin si “krenaria” e institucionit dhe duke nënvizuar se nga kjo klinikë janë formuar edhe profesionistë të rinj që sot punojnë në treg.
Lidhur me Eliona Pitarkën, klinika pretendon se ajo nuk ka pasur asnjë autorizim për të folur në emër të mjekëve të saj dhe se është trajtuar vetëm në cilësinë e pacientes, “me korrektësi dhe respekt”. Në deklaratë thuhet gjithashtu se drejtuesja e klinikës e ka këshilluar që në vitin 2023 të mos publikonte informacione që, sipas tyre, mund të konsiderohen dezinformuese për shëndetin e fëmijëve, por se ajo ka vijuar me publikime që “krijojnë konfuzion” dhe dëmtojnë seriozitetin e profesionit.
Klinika ngre edhe akuza të tjera, duke përfshirë përdorimin e materialeve filmike pa leje, si dhe mesazhe kërcënuese në telefonin personal të drejtueses, të cilat thotë se janë të dokumentuara. Në këtë kuadër, institucioni njofton se ka nisur procedurat ligjore dhe shton se procesi bazohet në Kodin Penal, duke përmendur se, në varësi të rasteve konkrete, parashikohen edhe masa ndëshkuese deri në tre vite burg.
Në fund të deklaratës, klinika shprehet se çdo gjobë apo dëmshpërblim që mund të përfitohet nga ky proces do të dhurohet për fëmijët e Jetimores së Tiranës, duke e cilësuar këtë si një akt human dhe simbolik. Ndërkohë, klinika thekson se do të vijojë aktivitetin me “korrektësi, profesionalizëm dhe transparencë”, në shërbim të pacientëve dhe shoqërisë.
