Ndërsa përplasja mes Brooklyn Beckham dhe familjes së tij vazhdon të jetë temë e nxehtë, Nicola Peltz duket se ka zgjedhur një mënyrë shumë të rafinuar por të mprehtë për të dërguar një mesazh pa thënë asnjë fjalë.
Aktorja publikoi një selfie para pasqyrës në Instagram, ku shfaqet me bikini top blu dhe ku vëmendjen e merr një tatuazh në pjesën e brinjëve. Nuk është tatuazh i ri, por momenti kur e vendos në fokus, pikërisht tani, u lexua si një “nëntekst” i qartë: sipas raportimeve, shkrimi në jidish përkthehet “Familja e para”. Një frazë e thjeshtë, por që në një konflikt familjar mund të tingëllojë si deklaratë pozicioni.
Nicola e shoqëroi postimin me një caption minimalist, vetëm me emoji delfinësh por në këto histori, shpeshherë më shumë “flasin” gjërat që nuk thuhen. Dhe ky detaj, i nxjerrë në pah në këtë moment, u interpretua si një mesazh i drejtuar jo vetëm publikut, por sidomos palës tjetër të historisë: familjes Beckham.
Postimi erdhi pak përpara reagimit të bujshëm të Brooklyn në Instagram, ku ai doli hapur kundër prindërve të tij dhe u shpreh se nuk kërkon pajtim, duke lënë të kuptohet se konfliktin e sheh si diçka të thellë dhe të mbledhur prej vitesh. Në të njëjtën linjë, raportimet flasin edhe për distancim në rrjete sociale: bllokime, unfollow, dhe fshirje postimesh ku shfaqej familja e tij veprime që zakonisht nuk janë thjesht “pastrim feed-i”, por deklarata në mënyrën e epokës digjitale.
Ndërkohë, pavarësisht zhurmës, Brooklyn dhe Nicola shfaqen të lidhur fort me familjen Peltz. Në postime të fundit, Nicola është treguar shumë emocionale ndaj nënës së saj, me dedikime të ngrohta dhe foto familjare, duke e theksuar hapur idenë e mbështetjes dhe afërsisë.
