“The White Lotus” duket si një serial që, nëpërmjet misterit dhe zhanrit thriller, trajton pushime luksoze, resorte ikonike dhe klientë pasanikë të llastuar. Por shumë shpejt kupton se bukuria është vetëm fasada. Në zemër të këtij seriali nuk është bollëku, por zbrazëtia që ai shpesh fsheh. Çdo sezon i “The White Lotus” vendoset në një destinacion real, që reflekton tensionin, dëshirat dhe konfliktet e personazheve.
Sezoni i parë zhvillohet në Hawai’i, në “Four Seasons Resort Maui at Wailea”, një simbol i pushimeve perfekte tropikale. Oqeani blu, gjelbërimi i dendur dhe qetësia vizuale krijojnë ambientin idilik, në të cilin seriali shpalos marrëdhënie të ftohta, tensione klasore dhe arrogancën e privilegjit. Hawai’i nuk shfaqet si një strehë shpirtërore, por si një vend ku personazhet përballen me veten e tyre, larg çdo shpërqendrimi të qytetit.
Në sezonin e dytë, historia zhvendoset në Evropë, në zemër të Siçilisë, në “San Domenico Palace”. Ky ish-manastir i shekullit XIV, i kthyer në hotel luksoz mbi detin Jon, sjell një atmosferë krejt tjetër. Siçilia me historinë e saj, ballkonet mbi shkëmbinj dhe arkitekturën e rëndë, krijon skenën perfekte për një sezon që eksploron marrëdhëniet romantike, tradhtinë dhe lojërat e pushtetit mes çifteve.
Sezoni i tretë e çon “The White Lotus” në Azi, në Tajlandë, me xhirime të realizuara në resorte luksoze në Phuket dhe Koh Samui. Ky sezon fokusohet më shumë te spiritualiteti modern, wellness-i dhe ideja e paqes së brendshme si luks i ri. Ambientet tropikale, vilat private dhe qetësia vizuale krijojnë një kontrast të fortë me konfliktet e brendshme të personazheve, duke e bërë këtë sezon më introspektiv dhe psikologjik.
Ajo që e bën “The White Lotus” të veçantë është mënyra se si përdor këto lokacione ikonike për të treguar një të vërtetë universale: sa më perfekte duket një vend, aq më të dukshme bëhen çarjet njerëzore.
