Kim Kardashian dhe ylli i Formula 1, Lewis Hamilton, kanë bërë daljen e tyre të parë publike si çift gjatë Super Bowl LX, duke i dhënë fund (të paktën për momentin) misterit që kishte qarkulluar në rrjet ditët e fundit.
Dyshja u pa krah për krah në tribunat e Levi’s Stadium në Santa Clara, California, gjatë ndeshjes mes New England Patriots dhe Seattle Seahawks. Pamjet e tyre u kapën edhe nga transmetimi ndërkombëtar i ndeshjes dhe brenda pak minutash nisën të qarkullonin me shpejtësi në X, ku reagimet ishin të shumta.
Sipas raportimeve, Kardashian dhe Hamilton njihen prej vitesh si miq, por së fundmi marrëdhënia duket se ka kaluar në një tjetër fazë. Po sipas të njëjtave burime, çifti ka kaluar një fundjavë romantike në Mbretërinë e Bashkuar, ku janë akomoduar në hotelin luksoz Estelle Manor në zonën e Cotswolds, kanë bërë edhe masazh për çifte dhe kanë darkuar në mënyrë private. Më pas, thuhet se kanë vazhduar me një qëndrim në Rosewood Hotel në Londër dhe e kanë mbyllur udhëtimin me një ndalesë në Paris.
Një burim i cituar nga The US Sun pretendohet se ka thënë se oraret e ngarkuara të të dyve i shtyjnë të “shfrytëzojnë çdo hapësirë” për të qenë bashkë dhe se aktualisht janë “të pandarë”, duke i përshtatur takimet me angazhimet e Kardashian.
Kardashian nuk ka folur publikisht drejtpërdrejt për raportin me Hamilton. Megjithatë, së fundmi, në podkastin “Khloé In Wonder Land” të Khloé Kardashian, ajo ka treguar se çfarë kërkon nga një partner: “moral dhe vlera të mira, qetësi, besueshmëri” dhe mbi të gjitha “të marrë përgjegjësi”. Ajo po ashtu ka pohuar se nuk ka qenë në një lidhje të fshehtë gjatë vitit të fundit, duke shpjeguar se koha dhe rutina me fëmijët e saj e bëjnë të vështirë hapësirën për jetën sentimentale.
Në aspektin e historive të mëparshme, Kardashian është përfolur për lidhje me Odell Beckham Jr. dhe ka qenë në një romancë të komentuar me Pete Davidson pas divorcit nga Kanye West, me të cilin ka katër fëmijë. Nga ana tjetër, Hamilton është lidhur ndër vite me emra të njohur si Nicki Minaj, Rihanna, Gigi Hadid dhe madje edhe me Kendall Jenner.
Për tani, kjo paraqitje në Super Bowl LX duket si sinjali më i qartë se thashethemet kanë kaluar në “realitet të dukshëm” dhe se historia Kardashian–Hamilton është tashmë në sytë e publikut.
