Këngëtari 57-vjeçar ka reaguar për herë të parë pasi emri i tij u përmend në përplasjen publike mes Brooklyn Beckham dhe prindërve të tij, David Beckham dhe Victoria Beckham. Në një intervistë për The Hollywood Reporter, Anthony e quajti situatën “jashtëzakonisht të pakëndshme”, por la të kuptohet se mënyra si po rrëfehet historia në publik “është larg së vërtetës”.
Anthony theksoi lidhjen e tij të afërt prej vitesh me familjen: ai ka deklaruar se i njeh që para se fëmijët të lindnin dhe se është kumbari i Cruz Beckham. Megjithatë, ai nuk pranoi të hyjë në detaje për çfarë ka ndodhur realisht mes palëve.
Gjithçka u ndez sërish pas një deklarate të Brooklyn-it në Instagram (janar 2026), ku ai pretendoi se në dasmën e tij të vitit 2022 me Nicola Peltz Beckham, momenti i planifikuar si vallëzimi “romantik” i çiftit u “rrëmbye” nga e ëma, duke e lënë atë të ndihej i sikletosur dhe i poshtëruar para të ftuarve. Sipas rrëfimit të tij, Anthony ishte pjesë e programit të mbrëmjes dhe u përmend si personi që e thirri në skenë.
Nga ana tjetër, burime pranë organizimit të dasmës kanë kundërshtuar interpretimin se bëhej fjalë për “vallëzimin e parë” të çiftit, duke thënë se të ftuarit kishin kohë që kërcenin dhe se episodi ndodhi gjatë performancës live të Anthony-t.
Në prapaskenë, përçarja duket se ka prekur edhe marrëdhëniet familjare më gjerë: vëllezërit/motrat e Brooklyn-it janë shfaqur publikisht në mbështetje të prindërve, ndërsa Romeo Beckham ka tërhequr vëmendje me një tatuazh të ri “family”, i interpretuar si mesazh i qartë në kulmin e debatit.
