James Van Der Beek, aktori që u bë fytyrë e një brezi të tërë si protagonisti i Dawson's Creek, ka ndërruar jetë në moshën 48-vjeçare, pas një beteje me kancerin kolorektal.
Lajmin e konfirmoi bashkëshortja e tij, Kimberly Van Der Beek, përmes një postimi në Instagram, ku shkroi se ai u shua i qetë dhe se ditët e fundit i përballoi me “kurajë, besim dhe dinjitet”. Familja kërkoi gjithashtu privatësi në këto momente zie.
Pas publikimit të lajmit, reagimet dhe mesazhet e ngushëllimit nisën menjëherë, nga fansat te kolegët e ekranit. Mes emrave që e përkujtuan publikisht ishin David Boreanaz, Sarah Michelle Gellar dhe Rumer Willis, të cilët folën për mirësinë e tij dhe gjurmën që la si njeri e si artist.
Aktori e kishte bërë publike diagnozën në vitin 2024 dhe prej asaj kohe fliste hapur për sëmundjen dhe rëndësinë e parandalimit, duke e kthyer historinë e tij personale edhe në një thirrje për ndërgjegjësim. Në muajt e fundit, për shkak të gjendjes shëndetësore, ai nuk arriti të ishte fizikisht i pranishëm në një aktivitet bamirësie ku u ribashkua pjesërisht kasti i Dawson's Creek, por i përshëndeti të pranishmit me një mesazh video.
Për publikun, ai do të mbetet përgjithmonë Dawson, djaloshi ëndërrimtar që u rrit para kamerave, por karriera e tij shkoi përtej atij roli: ai luajti edhe në filma si Varsity Blues dhe u shfaq në projekte televizive ku e përdori edhe autoironinë, duke e pranuar me sportivitet faktin që fama e madhe shpesh lidhet me një personazh të vetëm.
Ai lë pas bashkëshorten dhe gjashtë fëmijët e tyre.
View this post on Instagram
