Vesa Luma ka reaguar pas zhurmës së krijuar së fundmi rreth këngës “Valle Kosovare”, e interpretuar nga Shpat Kasapi, ku disa raportime ngritën dyshime se materiali muzikor është marrë pa të drejtë nga një këngëtar bullgar.
Përmes një postimi në rrjetet sociale, Vesa Luma e përdori këtë rast si një kujtesë të fortë për një problem që, sipas saj, i ka ndjekur artistët prej vitesh: mbrojtja e të drejtës autoriale. Ajo theksoi se krijimtaria nuk është thjesht “këngë”, por punë, mund dhe investim, që shpesh përfundojnë duke u shfrytëzuar nga të tjerë.
Në reagimin e saj, Luma nënvizoi se mungesa e respektit për autorësinë e dëmton vetë artistin, por edhe familjen e tij, sepse në momentin kur krijuesi nuk është më, ose kur vitet kalojnë dhe tregu ndryshon, janë të tjerët ata që përfitojnë nga ajo që ai ka ndërtuar, në vend që të përfitojnë fëmijët apo njerëzit e afërt. Ajo e cilësoi të padrejtë edhe mënyrën si, sipas saj, vlera e një krijimi mund të “zbresë” dhe të trajtohet si diçka që blihet lehtë, me shuma qesharake.
Në të njëjtën linjë, Vesa Luma solli në vëmendje edhe një debat të mëparshëm që lidhet me Tayna. Më herët, Alida Hisku kishte folur publikisht për faktin që zëri i saj ishte rikthyer në këngën “Thana” të Tayna-s, ku kënga hapet me refrenin e “Vajzat e fshatit tim”, një material i njohur i repertorit të saj.
Pas reagimeve dhe diskutimeve, u tha se Tayna e kishte kontaktuar Alida Hisku për ta formalizuar përdorimin dhe për të propozuar bashkëpunim. Por pikërisht këtu nisi polemika tjetër: pagesa e ofruar u përshkrua si simbolike, çka u kthye në temë debati mes artistëve dhe ndjekësve, sepse ngriti pyetjen se sa “vlen” realisht një zë, një refren, një kujtim muzikor që i përket një artisti tjetër.
