Ka diçka madhështore në idenë e të jetuarit, qoftë edhe për pak kohë, brenda mureve të një kështjelle. Një arratisje romantike, një fundjavë mes vreshtave, apo thjesht një përvojë që të bën të ndihesh sikur je pjesë e një filmi. Në Francë dhe Itali, disa nga kështjellat më të bukura janë sot të hapura për udhëtarët që kërkojnë ekskluzivitet dhe privatësi.
E vendosur mes kodrave të gjelbra dhe vreshtave të Beaujolais, Château de Bagnols është një nga kështjellat më romantike të Francës. Me origjinë mesjetare dhe interiore të restauruara me finesë, kjo kështjellë është një ndërthurje perfekte mes historisë dhe luksit modern. Sot, ajo funksionon si një hotel ekskluziv, ku mund të rezervoni një suitë ose një qëndrim të plotë për një arratisje private.
E quajtur shpesh “Versailles private”, Château de Villette është një nga rezidencat më elegante pranë Parisit. Kjo kështjellë aristokratike ofron diskrecion, ambiente madhështore dhe kopshte ku e gjelbërta krijon një peisazh fantastik, për ata që duan të përjetojnë Francën në mënyrën më të rafinuar.
Në zemër të Umbrias, mes pyjeve dhe kodrave të qeta italiane, Castello di Reschio është një nga destinacionet më të famshme në Itali. Një kështjellë ku çdo detaj është menduar për të krijuar një ndjesi intime, elegante dhe unike. Përveç suitave, Reschio ofron edhe vila private për ata që kërkojnë një përvojë tërësisht të veçantë.
Castello di Vicarello, një kështjellë boutique e vendosur në zonën e Maremma-s, është e përsosur për ata që duan një qëndrim të ngrohtë, privat dhe me shërbim personal. Me vetëm disa suita, çdo qëndrim këtu ndihet si një përvojë unike dhe e kuruar vetëm për ju. Të marrësh me qera një kështjellë nuk është më vetëm një ëndërr e largët. Sot, këto destinacione në Francë dhe Itali e bëjnë të mundur të jetosh për pak ditë përvojën mbretërore.
