Harry Styles ka folur për herë të parë publikisht për vdekjen e ish-shokut të tij të grupit One Direction, Liam Payne, duke e quajtur një humbje “të vështirë” dhe një temë për të cilën ende e ka të vështirë të flasë.
Në një intervistë të sinqertë për Apple Music, Styles tha se vetëm ideja për ta diskutuar këtë gjë e bën të ndihet i ngarkuar emocionalisht. Ai pranoi se, pas ndarjes nga jeta të Liam, pati një periudhë kur e kishte të vështirë të përballej me faktin se dhimbja e tij u bë edhe “publike”, si të kishte njerëz që ishin pjesë e zisë së tij në një mënyrë të çuditshme.
Sipas Styles, humbja e një miku është e rëndë gjithmonë, por bëhet edhe më e rëndë kur ai mik “është si ti në shumë mënyra”. Ai e përshkroi Liam si një njeri me “zemrën më të mirë”, që thjesht donte të ishte i madh në atë që bënte.
Këngëtari tha se kjo ngjarje e detyroi ta shihte më nga afër edhe jetën e vet: çfarë do të bëjë, si do ta jetojë, dhe çfarë kuptimi ka të ecësh përpara. Për Styles, mënyra më e madhe për të nderuar miqtë që ikin nga kjo jetë është “ta jetosh jetën deri në fund”, me gjithë intensitetin dhe vlerën e saj.
Në fund, ai e quajti Liam një person “shumë të veçantë” dhe e përmbylli me një fjali të thjeshtë, por të rëndë: është vërtet shumë e trishtueshme.
Liam Payne ndërroi jetë në tetor 2024, pasi ra nga ballkoni i dhomës së tij në një hotel në Buenos Aires, Argjentinë. Ai ishte 31 vjeç. Styles mori pjesë edhe në ceremoninë mortore në vitin 2024, ku u mblodhën edhe anëtarë të tjerë të One Direction.
