Brad Pitt vazhdon të jetë një nga figurat më magnetike të Hollivudit. Koha duket sikur nuk i afrohet dot: vitet i kanë dhënë atë lloj pjekurie që jo vetëm nuk e zbeh, por e bën edhe më tërheqës. Edhe fakti që ai u bë më i kujdesshëm me skincare (thuhet se ishte Gwyneth Paltrow ajo që e bindi të lante fytyrën dy herë në ditë) i ka shtuar asaj pamjeje të kuruar dhe të ndritshme që e shoqëron ende sot.
Por në të njëjtin “pantheon” të meshkujve mbi 50 vjeç që publiku i admiron për karizmën dhe pamjen, është edhe George Clooney. Që nga koha e “From Dusk Till Dawn” e më pas me sagën “Ocean’s”, Clooney ka qenë për dekada një lloj “dandy”-je i kinemasë: elegant, i qetë dhe me një sharm të natyrshëm. Dhe me kalimin e viteve, në vend që ta humbasë këtë magnetizëm, ai duket se e ka forcuar edhe më shumë.
Megjithatë, krahasimet me Brad Pitt kanë qenë të pashmangshme, sidomos kur të dy shfaqen në të njëjtat projekte apo evente. Vetë Clooney ka folur hapur për këtë në një intervistë të vitit 2016 për revistën gjermane Meins:
“Jam vetëm dy vite më i madh se Brad Pitt, por dukem shumë më i vjetër. Dikur më bezdiste kjo gjë, tani nuk më intereson më.”
Në të njëjtën intervistë, aktori reflektoi edhe për marrëdhënien e tij me moshën.
“Më pëlqejnë flokët e mi gri dhe rrudhat. Më pëlqen që fytyra ime sot tregon më shumë personalitet dhe karakter sesa kur isha 20 apo 30 vjeç. Nuk kam nevojë për botoks.”
Sekretet e bukurisë së George Clooney
Nëse Brad Pitt e ka rafinuar me kalimin e viteve një rutinë të kujdesshme skincare, George Clooney ndjek një filozofi krejt tjetër: “less is more”.
Aktori ka treguar se rutina e tij e kujdesit për lëkurën është shumë e thjeshtë dhe nuk përfshin trajtime të ndërlikuara apo produkte të shumta.
Në një intervistë për Mirror, ai u shpreh:
“Shkoj në spa dhe shijoj banjën turke, por në fakt nuk përdor produkte specifike. Një sapun i mirë Ivory është i mjaftueshëm.”
Sot, në moshën 64-vjeçare, Clooney përfaqëson një elegancë të natyrshme dhe të çlirët. Ai nuk ka asnjë kompleks për flokët e thinjur, përkundrazi i konsideron pjesë të sharmit të tij. Qasja e tij ndaj bukurisë është e thjeshtë, autentike dhe në harmoni me një ide tërheqjeje që nuk ka frikë nga kalimi i kohës.
