I vendosur në brigjet lindore të liqenit Como, Mandarin Oriental Lago di Como përfaqëson një kombinim mes arkitekturës historike italiane dhe standardit ndërkombëtar të një prej markave më të njohura të hotelerisë luksoze. Struktura kryesore e hotelit është Villa Roccabruna, një vilë e shekullit XIX, e cila është restauruar dhe integruar në kompleks.
Hoteli sot përfshin vilën historike të restauruar, një vilë tjetër më të vogël (Villa Nena) dhe struktura moderne të shtuara më vonë. Kompleksi organizohet me dhoma dhe suita me pamje nga liqeni, vila private me pishinë, kopshte dhe tarraca që zbresin drejt ujit. Arkitektura ruan karakterin klasik italian, ndërsa interierët ndjekin një estetikë minimaliste dhe të përmbajtur.
Një nga elementët më të fotografuar është pishina “infinity” mbi liqen, e cila krijon efektin vizual të vazhdimësisë me ujin. Spa-ja e hotelit konsiderohet ndër më të avancuarat në zonë, me trajtime për trupin e fytyrën, sauna, pishinë të brendshme dhe programe “wellness” të personalizuara.
Restoranti i hotelit fokusohet në kuzhinën italiane me përbërës sezonalë, ndërsa shërbimi ndjek filozofinë e Mandarin Oriental: profesional dhe i detajuar. Pozicionimi i hotelit ofron privatësi dhe qetësi, larg qendrave më të mbipopulluara të liqenit, duke e bërë tërheqës për udhëtarët që kërkojnë diskrecion.
Liqeni i Komos ka qenë historikisht një destinacion i preferuar i aristokracisë europiane dhe, në dekadat e fundit, i figurave publike ndërkombëtare. Bukuria e “Mandarin Oriental Lago di Como” qëndron në balancën mes historisë, natyrës dhe standardit të lartë të shërbimit. Për udhëtarët që kërkojnë një eksperiencë të rafinuar italiane, kjo adresë mbetet përherë e preferuar!
