Pas vitesh hitesh, emocionesh të forta dhe një lidhjeje shumë të veçantë me publikun, Fifi po bëhet gati për një hap të madh në karrierën e saj: koncertin e parë recital.
Lajmin e ka ndarë vetë këngëtarja përmes një video-mesazhi emocionues në rrjetet sociale, ku ka zbuluar se më 25 prill, në Pallatin e Kongreseve në Tiranë, do të ngjitet në skenë për një mbrëmje që premton të jetë shumë më tepër se një koncert i zakonshëm.
Në mesazhin e saj, ajo ka lënë të kuptohet se pas këtij projekti fshihet një punë e gjatë dhe intensive, e ndërtuar me kujdes bashkë me ekipin e saj, në mënyrë që gjithçka të vijë sa më e plotë dhe sa më e vërtetë në skenë.
Dhe nëse ka një gjë që publiku e di për Fifin, është se ajo nuk del kurrë “gjysmë” në skenë. Ajo vjen gjithmonë me zemër, me ndjenjë dhe me një mënyrë të veçantë për ta kthyer muzikën në rrëfim.
Pikërisht këtë premton edhe për këtë mbrëmje.
“Fifi po vjen me historinë e vet, me muzikën, ndjenjën, zemrën… Kjo është dhurata ime për ju që e doni muzikën time,” është shprehur artistja, duke e kthyer koncertin në një ftesë intime për të gjithë ata që e kanë ndjekur dhe mbështetur ndër vite.
Ky recital pritet të mbledhë një numër të madh adhuruesish dhe të kthehet në një nga ngjarjet muzikore më të komentuara të kësaj pranvere në Tiranë. Jo vetëm sepse është koncerti i parë i Fifit, por sepse ajo është një nga ato artiste që nuk këndon thjesht këngë, por nxjerr në skenë gjendje, plagë, dashuri, thyerje dhe forcë.
Në një treg muzikor ku shumë gjëra kalojnë shpejt, Fifi ka ditur të mbetet. Jo sepse është e zhurmshme, por sepse është e vërtetë. Dhe ndoshta pikërisht për këtë arsye, koncerti i saj i parë pritet me kaq interes: sepse publiku nuk po pret vetëm një performancë, por një histori të treguar live.
Biletat do të dalin në shitje së shpejti. Dhe për fansat e saj, 25 prilli duket se do të jetë një natë për t’u mbajtur mend.
View this post on Instagram
