Nicole Kidman ka folur publikisht për herë të parë për divorcin me Keith Urban, pas ndarjes së tyre në shtator 2025. Në një intervistë të publikuar së fundmi, aktorja 58 vjeçare e përshkroi periudhën si të vështirë, por u fokusua te një mesazh i vetëm: familja dhe ecja përpara.
“Unë gjithmonë do të lëviz drejt asaj që është e mirë,” është shprehur Kidman, duke shtuar se gjëja për të cilën ndihet më mirënjohëse është familja e saj dhe ruajtja e saj ashtu siç është. Ajo theksoi se nuk do të hyjë në detaje të tjera “nga respekti”, duke e mbajtur veten në një vend ku ideja kryesore mbetet se ata do të vazhdojnë të jenë familje.
Në intervistë, Kidman foli me shumë dashuri për vajzat e saj, Sunday 17 vjeçe dhe Faith 15 vjeçe, duke thënë se ato “papritur janë bërë gra”, një fjali që tregon jo vetëm kalimin e kohës, por edhe ndryshimin e madh që vjen kur fëmijët rriten dhe familja hyn në një kapitull tjetër.
Ndarja e çiftit u bë lajm në shtator 2025, pas gati dy dekadash martesë. Vetëm një ditë më pas, Kidman dorëzoi kërkesën për divorc. Më pas, divorci u finalizua në janar, me raportime që thonë se të dy palët ranë dakord të heqin dorë nga kërkesat për mbështetje financiare bashkëshortore dhe për fëmijët. Po sipas këtyre raportimeve, u përcaktua edhe një marrëveshje për kohën me vajzat, ku Kidman do të kishte shumicën e ditëve, ndërsa Urban do t’i shihte ato çdo fundjavë të dytë.
Edhe pse kjo është hera e parë që Kidman e adreson hapur ndarjen, ajo kishte lënë të kuptohej më herët se emocionalisht po e kalonte me vështirësi, kur në një bisedë në fund të 2025 tha thjesht: “Po e mbaj veten.”
Ajo kujtoi gjithashtu se gjatë kohës kur ndarja u bë publike, ishte duke punuar në vazhdimin e “Practical Magic” me Sandra Bullock dhe se në atë set ishte ndier e mbrojtur dhe e sigurt, si një lloj strehimi në mes të një periudhe të trazuar.
Nga ana tjetër, Keith Urban nuk ka folur publikisht për divorcin. Në muajt e fundit, emri i tij është përfolur për lidhje të mundshme, por njëra prej artisteve që u përmend në thashetheme i ka mohuar publikisht këto zëra.
