Kylie Jenner po flet më hapur për planet e saj familjare dhe nuk e fsheh që dëshira për të pasur më shumë fëmijë është ende aty. Në një intervistë të re për Vanity Fair, ylli i “The Kardashians” ka shpjeguar se si e imagjinon kohën e radhës së jetës së saj, duke vendosur fillimisht një fokus të qartë: vitet e fundit të të 20-ave i do për veten, punën dhe dy fëmijët që ka tashmë.
“Gjatë viteve të fundit të të 20-ave dua të fokusohem te vetja, bizneset e mia, puna, udhëtimet me fëmijët e mi dhe t’i shijoj ata”, ka thënë Jenner, 28 vjeçe, duke iu referuar vajzës Stormi (8) dhe djalit Aire (4). Pastaj, shton ajo, “dua të kem më shumë fëmijë”.
Kylie u bë nënë në vitin 2018, kur solli në jetë Stormi-n me ish partnerin e saj Travis Scott, ndërsa katër vite më vonë erdhi në jetë edhe Aire. Ndarja e tyre u bë lajm në fillim të vitit 2023 dhe më pas Jenner u lidh me aktorin Timothée Chalamet, me të cilin, sipas raportimeve, janë bashkë prej tre vitesh.
Edhe vetë Chalamet ka lënë të kuptohet më herët se familja dhe fëmijët janë në horizont. Në një bisedë të vitit 2025, ai foli për një video ku njerëzit “mburreshin” që nuk kishin fëmijë dhe e quajti këtë mënyrë të të menduarit “të zymtë”. Në të njëjtën periudhë ai përmendi edhe faktin që shumë nga bashkëpunëtorët e tij po hynin në “fazën e re” të jetës, duke përmendur fejesa dhe martesa në rrethin e tyre.
Më vonë, gjatë një eventi promovues, Chalamet u pyet direkt nëse do të martohej ndonjëherë dhe ai u shpreh se, po, një ceremoni martese është “në tavolinë”, edhe pse e quajti pyetjen shumë personale dhe bëri shaka se mund ta fuste “në telashe”.
Nga ana e saj, Kylie ka thënë edhe më herët se nuk ka një “plan” të ngurtë apo një numër të saktë në mendje për sa fëmijë do në të ardhmen, duke nënvizuar se “çfarëdo që të ndodhë, është e destinuar të ndodhë”.
Edhe pse marrëdhënien e kanë mbajtur kryesisht larg syrit të publikut, në intervistën e fundit Jenner u pyet për Chalamet dhe u duk pak e “hutuar” nga vëmendja, por u përgjigj shkurt kur u pyet nëse është ndier mirë kur aktori e ka përmendur në mënyrë romantike gjatë sezonit të çmimeve: “Sigurisht”.
