Një ngjarje e rëndë ka tronditur Gjakovën në orët e para të mëngjesit, ku si pasojë e të shtënave me armë zjarri ka humbur jetën Rasim Binakaj, 38 vjeç, i cili raportohet se është xhaxhai i ish-finalistes së Big Brother VIP Kosova 4, Elijona Binakaj. Sipas raportimeve, ngjarja ka ndodhur rreth orës 05:20–05:30 në rrugën “Vëllezërit Frashëri”, ndërsa nga të shtënat ka mbetur i plagosur edhe një person tjetër, i cili është dërguar për trajtim mjekësor.
Sipas Policisë së Kosovës, hetimet janë në zhvillim dhe si i dyshuar për rastin po kërkohet Nexhdet Zymberaj, i përmendur në raportime si pronari i lokalit “My Place”, ku dyshohet se ka nisur konflikti. Autoritetet kanë bërë të ditur se po punojnë për zbardhjen e plotë të rrethanave dhe për kapjen e të dyshuarit.
Në vendin e ngjarjes janë sekuestruar prova materiale, ndërsa rasti është trajtuar si vrasje e rëndë. Ngjarja ka shkaktuar tronditje të fortë në Gjakovë, por edhe reagime të shumta në rrjet, për shkak të lidhjes familjare të viktimës me Elijona Binakajn. Deri tani, ajo nuk ka bërë ende një reagim publik.
