Michael B. Jordan është shpallur Aktori më i Mirë në Oscar 2026, në një nga garat më të paparashikueshme të këtij sezoni çmimesh. Ylli i Sinners mori statujën falë interpretimit të dyfishtë si binjakët Smoke dhe Stack në horror dramën e drejtuar nga Ryan Coogler. Kur u ngjit në skenë për ta marrë çmimin, Jordan e përsëriti disa herë: “Zoti është i mirë”.
Gara për Best Actor këtë vit nuk pati favorit të qartë deri në minutën e fundit. Në fillim të sezonit, shumëkush e shihte Timothée Chalamet si të parin, pas suksesit me Marty Supreme dhe fitoreve në Critics Choice Awards dhe Golden Globes. Më pas, Robert Aramayo fitoi BAFTA për I Swear, ndërsa Jordan mori çmimin kryesor te Actor Awards, fitore që i dha atij “shtysën” vendimtare drejt Oscar-it. Edhe Wagner Moura, i nominuar për The Secret Agent, kishte marrë një Golden Globe në janar, bashkë me Chalamet.
Në fund, ishte pikërisht momentumi pas Actor Awards ai që e çoi Michael B. Jordan, në nominimin e tij të parë për Oscar, deri te fitorja.
Në fjalimin e falënderimit, aktori u shpreh se e ndien mbështetjen e publikut dhe se kjo e motivon të punojë edhe më fort. Mesazhi i tij ishte i qartë: njerëzit kanë investuar te ai dhe ai do t’ua kthejë këtë besim duke vazhduar të rritet dhe të japë më të mirën.
Jordan bëri edhe një homazh të veçantë për aktorët e zinj që e kanë fituar Oscar-in para tij si aktorë protagonistë: Sidney Poitier, Denzel Washington, Jamie Foxx, Forest Whitaker dhe Will Smith. Ai përmendi edhe Halle Berry, si gruaja e parë me ngjyrë që ka fituar Oscar-in për aktoren protagoniste, duke e lidhur fitoren e tij me një rrugë të hapur nga të tjerë para tij.
Jordan e nisi fjalimin me emocion, duke folur për nënën e tij dhe duke kërkuar me sy babanë, të cilin e përmendi si të ardhur nga Gana për ta ndjekur atë natë. Ai falënderoi edhe vëllanë, motrën dhe gjithë familjen e tij.
Më pas, ai i drejtoi falënderime Warner Bros. dhe drejtuesve që, sipas tij, besuan në ëndrrën dhe vizionin e Ryan Coogler-it, në kulturën që filmi përfaqëson dhe në idetë origjinale e artin autentik. Për Coogler-in ai përdori fjalë shumë personale, duke thënë se i dha hapësirë dhe mundësi të “shihej” dhe se është i nderuar ta quajë bashkëpunëtor e mik.
Jordan nuk harroi as kastin, duke përmendur disa nga emrat kryesorë dhe duke falënderuar për mënyrën si secili e ndërtoi filmin.
Në fund, ai e mbylli me një falënderim për publikun që e ka mbështetur gjatë gjithë karrierës dhe veçanërisht për ata që kanë shkuar ta shohin Sinners në kinema më shumë se një herë, duke thënë se janë pikërisht ata që e kanë bërë filmin atë që është sot.
Një fjalim me shumë zemër, me shumë mirënjohje dhe me një ide të vetme që e përshkoi nga fillimi në fund: kjo fitore nuk është një vijë mbyllëse, por një premtim që ai “do të vazhdojë të dalë përpara” dhe të japë maksimumin.
