Miley Cyrus mori pjesë në premierën botërore të programit televiziv “Hannah Montana 20th Anniversary Special” në Los Angeles, Kaliforni, SHBA, më 23 mars 2026.
Me flokët biondë dhe balluket e “Hannah Montana”, Miley Cyrus u kthye te rrënjët e saj, duke festuar 20-vjetorin e serialit televiziv që nisi karrierën e një ylli të vërtetë të pop-it në jetën reale.
Cyrus u ribashkua me anëtarët e kastit të “Hannah Montana” të hënën në mbrëmje në Los Angeles për premierën e “Hannah Montana 20th Anniversary Special”.
Cyrus i tha The Associated Press se ky moment i rëndësishëm i ka dhënë mundësinë ta shohë personazhin dhe serialin “nga një perspektivë e re”. Cyrus, e cila e nisi serialin e Disney Channel në moshën 13-vjeçare, luante Miley Stewart, një vajzë në prag të adoleshencës dhe nxënëse shkolle, që fshihte jetën e saj sekrete si këngëtare e famshme pop.
“Të jem tani nga jashtë, të jem e rritur dhe të jem pjesë e kësaj në një mënyrë që nuk mundesha kur isha në mes të gjithçkaje më parë, me gjithë kaosin, oraret dhe performancat,” tha Cyrus, “tani thjesht bëhet një festë. Pra, është një perspektivë e re. Dhe më pëlqen kjo.”
Speciali i përvjetorit, që nisi transmetimin të martën në Disney+ dhe Hulu, feston 20 vjet nga premiera e serialit. I xhiruar përpara një publiku live, ai përfshin muzikë, pamje arkivore dhe një intervistë me Cyrus, tani 33 vjeçe dhe një yll i vërtetë pop, e realizuar nga moderatorja e podcast-it Alex Cooper.
Duke iu drejtuar publikut në premierë, Cyrus bëri homazh si për kolegët e kastit, ashtu edhe për fansat. “Pa ju të gjithëve, ky serial nuk do të ishte bërë kurrë ai që është, dhe më pëlqen të them çfarë është, jo çfarë ishte,” tha ajo.
“Sonte nuk bëhet fjalë për të parë pas në të shkuarën, por për atë çfarë do të thotë ende për ne sonte,” tha ajo.
Jason Earles, i cili luante vëllain e Miley-t, Jackson, i tha AP se shikimi i serialit tani të bën të kuptosh sa shumë kohë ka kaluar.
“Mendoj se nëse kthehesh dhe sheh episodet, ka mjaft referenca të vjetra, si telefonat me kapak e gjëra të tilla, sa të thuash: ‘Oh jo, jo, ky serial qenka bërë para ca kohësh’,” tha ai.
Cody Linley, i cili luante të dashurin me ndërprerje të Miley-t, Jake Ryan, reflektoi mbi ndikimin e të luajturit rolin e një idhulli adoleshent.
“Është e vështirë të besohet se kishte vajza që kishin fotografi të miat pa bluzë në dollapët e tyre dhe më kërkonin t’ua firmosja,” tha Linley. “Dhe është e vështirë të mos të të hipë në kokë, sepse duhet të kujtosh se ajo që ato shohin është një imazh. Nuk je ti.”
Në premierë mori pjesë edhe këngëtarja country Lainey Wilson, e cila kujtoi se në fillimet e karrierës së saj kishte punuar si imituese e “Hannah Montana”.
“Nga klasa e tetë deri në klasën e dymbëdhjetë, për pesë vite të jetës sime, unë hapja shfaqjen si Lainey Wilson, pastaj vrapoja pas një peme dhe vishja kostumin tim të ‘Hannah Montana’,” tha këngëtarja. “Bëja festa ditëlindjesh, panaire, festivale... isha vazhdimisht në rrugë.”
