Arti italian është në zi. Është ndarë nga jeta në moshën 91 vjeçare kantautori i njohur italian Gino Paoli, një nga figurat më përfaqësuese të muzikës së lehtë italiane dhe një nga themeluesit e ashtuquajturës “shkolla gjenoveze”.
Kjo rrymë muzikore do të sillte më pas emra të mëdhenj si Fabrizio De André, Luigi Tenco, Bruno Lauzi dhe Umberto Bindi, duke shënuar një nga periudhat më të rëndësishme të këngës italiane.
I lindur në vitin 1934 në Monfalcone, por i lidhur ngushtë me qytetin e Gjenovas, Paoli la një gjurmë të thellë në historinë e muzikës përmes kompozimeve të tij të paharrueshme.
Mes këngëve më të njohura të repertorit të tij janë “Il cielo in una stanza”, e bërë e famshme nga Mina, “Sapore di sale” dhe “Senza fine”, kjo e fundit e lidhur ngushtë me Ornella Vanoni, me të cilën ai pati një marrëdhënie të gjatë artistike dhe sentimentale.
Që nga vitet 60, Gino Paoli kontribuoi në transformimin e këngës italiane, duke e trajtuar dashurinë si një përvojë konkrete dhe thellësisht emocionale, shpesh e përshkuar nga melankolia. Ai ndërthurte me mjeshtëri gjuhën e këngës popullore me vargun poetik, duke krijuar një stil unik që ndikoi breza të tërë artistësh.
