Egla Ceno ka zgjedhur të flasë me një sinqeritet të rrallë në një moment jo të lehtë të jetës së saj. Aktorja ka ndarë me ndjekësit një rrëfim personal që vjen mes artit, lodhjes shpirtërore dhe nevojës për t’u larguar për pak kohë nga zhurma publike.
Përmes një mesazhi të publikuar në rrjetet sociale, Egla ka bërë të ditur se ka përfunduar xhirimet për filmin “Përqafuesi”, projektin që ajo e përshkruan si rolin e saj të fundit në kinema.
Aktorja e ka cilësuar këtë eksperiencë si shumë të rëndësishme për të, jo vetëm për peshën e rolit, por edhe për energjinë e ekipit me të cilin ka punuar. Në veçanti, ajo ka vlerësuar bashkëpunimin me Gaz Pajën, si edhe me një brez të ri artistësh, të cilët, sipas saj, i janë qasur këtij projekti me përkushtim, pasion dhe dashuri për artin.
Por përtej filmit dhe emocioneve që sjell një mbyllje xhirimesh, mesazhi i Eglës kishte një tjetër peshë. Një peshë shumë më personale. Ajo ka njoftuar se do të tërhiqet nga vëmendja publike për një periudhë kohe, duke kërkuar mirëkuptim si nga mediat, ashtu edhe nga publiku.
