Përplasja mes Gjestit dhe kompanisë Onima ka hyrë tashmë në një fazë të re, këtë herë zyrtarisht në rrugë ligjore. Artisti është paraqitur sot bashkë me ekipin e tij mbrojtës për të bërë publik faktin se është dorëzuar një kallëzim penal ndaj kompanisë, stafit dhe bashkëpunëtorëve të saj, në një çështje që lidhet drejtpërdrejt me të drejtat autoriale mbi veprat e tij muzikore.
Me një deklaratë të shkurtër, por shumë të qartë në mesazhin që kërkonte të jepte, Gjesti u shpreh se kjo lëvizje nuk ka të bëjë me asgjë tjetër përveç lirisë së tij si artist. “Sot e kemi bërë një kallëzim penal ndaj kompanisë Onima dhe asgjë s’po lypim më shumë as më pak, veç të drejtën time dhe të jem i lirë, asgjë tjetër, vetëm paratë e mia”, tha ai para mediave, duke e përmbledhur gjithë qëndrimin e tij në dy kërkesa thelbësore: liri artistike dhe të drejtat që pretendon se i takojnë.
Sipas asaj që është bërë publike nga mbrojtja e tij ligjore, thelbi i kallëzimit lidhet me pretendimin se Onima ka vepruar mbi bazën e një kontrate që, sipas palës së Gjestit, nuk është nënshkruar kurrë prej tij dhe nuk është pranuar asnjëherë me vullnet të lirë. Avokati Burim Azemi ka deklaruar më herët se kontrata e distribucionit me Onima daton nga qershori i vitit 2023, me afat dyvjeçar deri në qershor 2025, por sipas tij ajo është vazhduar më tej pa vullnetin e artistit.
