Punonjësit e rinj nuk e kanë më ëndërr të ngjiten në pozicione drejtuese. Gjithnjë e më pak të rinj synojnë role menaxheriale dhe, nëse bizneset nuk arrijnë të zhvillojnë liderët e së ardhmes dhe të motivojnë Gjeneratën Z të marrë role drejtuese, ato mund ta kenë gjithnjë e më të vështirë të ruajnë efikasitetin organizativ.
Për Gjeneratën Z, suksesi në karrierë nuk matet më me promovime. Shumë të rinj i japin përparësi balancës mes punës dhe jetës private, në vend që të marrin më shumë përgjegjësi dhe të punojnë më gjatë. Ky trend po kthehet në një sfidë serioze për bizneset, të cilat tashmë po hasin vështirësi në përgatitjen e brezit të ardhshëm të drejtuesve.
“Sipas studimeve globale, vetëm rreth 6% e Gjeneratës Z duan të marrin role të larta menaxheriale dhe të bëhen shefa. Për organizatat dhe strukturat e tyre, kjo është një problem shumë i madh,” tha për Euronews Tomasz Szklarski, CEO i Enpulse dhe ekspert për angazhimin në vendin e punës.
Sipas tij, arsyeja kryesore pse të rinjtë nuk dëshirojnë të bëhen menaxherë lidhet me rritjen e përgjegjësive që sjell ky pozicion. Vitet e fundit, numri i punonjësve që raportojnë te një menaxher është rritur ndjeshëm. Madhësia mesatare e ekipeve është dyfishuar, nga rreth 6 në 12 persona.
Kjo ka shtuar presionin mbi menaxherët. Nga njëra anë, ata duhet t’u përgjigjen drejtuesve të kompanisë për arritjen e objektivave të biznesit, ndërsa nga ana tjetër pritet të mbështesin zhvillimin, motivimin dhe mirëqenien e ekipeve gjithnjë e më të mëdha.
“Gjenerata Z e ka peshuar me kujdes se çfarë do të thotë balanca mes punës dhe jetës private, përballë sakrificave që kërkon të qenit shef. Të rinjtë e shohin qartë barrën që vjen me drejtimin e një ekipi. Një menaxher është përgjegjës si ndaj eprorëve, ashtu edhe ndaj ekipeve gjithnjë e më të mëdha që kanë nevojë për mbështetje të vazhdueshme,” tha Szklarski.
Një problem që mund ta godasë veçanërisht Evropën
Rënia e interesit për pozicionet drejtuese nuk është vetëm problem për kompanitë individuale, por një trend global që mund të jetë veçanërisht sfidues për Evropën, ku ndryshimet demografike po zvogëlojnë numrin e njerëzve në tregun e punës.
“Do të ketë gjithnjë e më pak njerëz që punojnë, sidomos në Evropë. Nëse nuk trajnojmë një brez të ri menaxherësh dhe nuk përgatisim njerëzit për të marrë përgjegjësinë e drejtimit të ekipeve, do të përballemi me sfida gjithnjë e më të mëdha në ruajtjen e efikasitetit organizativ,” paralajmëroi eksperti.
Edhe pse inteligjenca artificiale (AI) po automatizon gjithnjë e më shumë procese në botën e biznesit, Szklarski beson se ajo nuk do ta zgjidhë mungesën e menaxherëve. Sipas tij, mbetet e paqartë nëse punonjësit do të ishin të gatshëm të merrnin udhëzime nga algoritmet ose nëse AI mund të përmbushë me sukses rolin e një menaxheri.
Drejtimi i ekipeve kërkon aftësi që janë ende të vështira për t’u zëvendësuar, si empatia, ndërtimi i marrëdhënieve, motivimi i punonjësve dhe marrja e vendimeve që marrin parasysh anën njerëzore të një organizate.
