6 prilli njihet nga të gjithë adhuruesit e pastave si Dita Ndërkombëtare e Pastave Carbonara, një prej recetave më të famshme italiane. Kjo ditë festohet nga të gjithë italianët, por natyrisht edhe nga të apasionuarit e pastave që nga viti 2017. Organizata Ndërkombëtare e Pastave (IPO), së bashku me Shoqatën Italiane të Pastave dhe Ëmbëlsirave, vendosën ta ndërkombëtarizojnë këtë ditë në shenjë promovimi të një prej shijeve më të preferuara të kuzhinës italiane.
Përmes hashtag #CarbonaraDay, ju mund të shikoni edhe disa prej personazheve të njohur që kanë gatuar sot pikërisht këtë recetë.
Receta e Spaghetti Carbonara
350 gr makarona
4 të verdha veze
150 gr pançetë e tymosur
2 lugë vaj ulliri
djathë
kripë
piper
Përgatitja
Ziejmë makaronat Spaghetti në një tenxhere me ujë të kripur. Ndërkohë, në një tigan skuqim pançetën e prerë në kubik me 2 lugeë vaj ulliri derisa të bëhet paksa krokante (rreth 4 minuta). E heqim nga zjarri dhe e lëmë të ftohet.
Në një enë qelqi rrahim të verdhat e vezëve me djathin e deles, shtojmë piper sipas dëshirës dhe në momentin e fundit (përpara se t’i bashkojmë me makaronat), shtojmë pançetën e skuqur.
Kullojmë makaronat dhe i hedhim në enën e qelqit duke i përzierë mirë me salcën e përgatitur më sipër.
I servirim të ngrohta duke i spërkatur sipër me pak piper të zi (sipas dëshirës) dhe djathë dele të grirë.
KËSHILLË: Makaronat dhe salca e përgatitur nuk duhet të bashkohen mbi zjarr. Kjo për arsye se do të shkaktonte “gatimin” e vezëve dhe do t’i bënte të dukeshin si të skuqura.
(Receta nga kuzhinashqiptare.com)
