Print në kohërat e krizës, 10 vjet Mapo, mes gazetarëve dhe politikanëve

Nisur si një revistë javore, sot dhjetë vjet nga ajo datë, Mapo është logoja e disa enteve të komunikimit, siç e ka quajtur drejtori mediave Mapo, Alfred Lela, me gazetën e përditshme, revistat Mapo dhe Madame Mapo, mapo.al dhe një agjenci fotografie, Mapo Image.

Është përshtatur gjatë këtyre viteve, por edhe ka vazhduar të mos heqë dorë nga printi, duke arritur të mbushë 10 vjet në kohërat më të vështira për median e shkruar.

Një arsye për të festuar, sigurisht, për botuesin Henri Çili, i cili bashkë me drejtuesit aktualë të mediave Mapo organizoi mbrëmë, një takim festiv në ambientet e Hotel Rogner, ku ishin të ftuar njerëzit që i kanë drejtuar dhe ata që iu kanë dhënë fjalët, faqeve të këtyre mediave, personazhe të pranishëm në to gjatë këtyre viteve dhe kolegë gazetarë.

Enkas për këtë 10-vjetor ishte përgatitur një album special, me qëndrime të ndryshme editoriale, ide dhe rrëfimet e themeluesëve të saj, i cili u shpërnda gjatë takimit.

Nuk mund të mungonin çastet zyrtare që u ndanë mes botuesit Henri Çili, Bujar Kapexhiut, artistit që i ka shtuar autenticitet gazetës me karikaturat e tij dhe kryeredaktorit të ditës së parë të Mapo-s, Skënder Minxhozi, kryeredaktorit Arion Sulo dhe drejtorit Alfred Lela, të cilët folën gjatë takimit.

Vani Dafa, i Class Photography ishte aty, për të sjellë disa nga çastet më të rëndësishme të mbrëmjes.