Studimet e fundit thonë që meshkujt rrisin mjekrën për t’u bërë më tërheqes. Kjo pamje përforcon vetëbesimin e tyre dhe është një përshtatje me botën e re, që ngelet po aq xhungël sa e vjetra në disa lloje marrëdhëniesh. Me një mjekër hipster, meshkujt ngjajnë më të lirë dhe më rebelë, më natyrorë dhe si pasojë më burrëorë si përballë meshkujve të tjerë, ashtu edhe përballë femrave.
Sigurisht me gjithë këto përfitime, nuk kishte si të mos ecte lehtë si trend në fushën e modës, edhe një herë tjetër dhe të kthehej nga zgjedhja ekstravagante e meshkujve të njohur, te look-u i djemve të zakonshëm, që i shohim në rrugët e qytetit. Dhe e mira e saj është që e zhduk diskutimin “më shkon apo nuk më shkon?”.
