Pritja e ëmbël është një nga ato periudhat e veçanta në jetën e një gruaje, që le gjurmë përjetimesh nga më të ndryshmet. Nga emocionet, tek ndryshimet fizike dhe çdo element tjetër që vjen bashkë me krijesën më të re që i shtohet familjes, shtatzënia mbetet një nga ato momentet e paharrueshme. Duket të jetë e tillë edhe për moderatoren e njohur Arbana Osmani.

Për mamin e Jonit, ka ende momente për t’u kujtuar nga kjo periudhë e jetës dhe për këtë ka mjaftuar sot vetëm një episod gatimi në shtëpi që prezantuesja e njohur të ndajë me të gjithë ndjekësit dhe fansat e saj të shumtë virtual një nga torturat më të mëdha që ka kaluar gjatë shtatzënisë.

Dihet tashmë që përveç televizionit, një nga pasionet e tjera të mëdha të Arbanës është gatimi dhe talentin ajo e ka shpalosur edhe në një libër që ka botuar disa vite më parë me titull: “Receta për njerëzit që dua”. Sot në shtëpinë e moderatores ka qenë dita e sushit dhe gjatë pasazheve të përgatitjes së kësaj recete, Arbana ka ndarë edhe një moment nga shtatzënia dhe pamundësia për të shijuar sushit gjatë kësaj periudhe nëntë mujore.

“Kërkoj falje për gjithë shtatzënat. Mos ngrënia dot e sushit me peshk të gjallë ka qenë edhe për mua një torturë gjatë asaj periudhe”, thekson moderatorja që ndau kështu me ne një element që nuk e dinim gjatë shtatzënisë së saj.