Ditët e fundit disa zjarre kanë përfshirë vendin tonë dhe situata është bërë shqetësuese në disa qytete.

Megjithatë, Ministria e Mbrojtjes ka reaguar me një njoftim ku thotë se vatrat e zjarreve ndodhen larg zonave të banuara, prandaj nuk paraqesin rrezik për qytetarët.

Aktualisht janë angazhuar 200 efektivë të Forcave të Armatosura që u kanë ardhur në ndihmë zjarrfikësve. Ndërsa vatrat e zjarrit që janë ende aktive ndodhen në Lezhë, Gramsh, Fier, Mallakastër dhe Berat.

Njoftimi i Ministrisë së Mbrojtjes:

"Rreth 200 efektivë të Forcave të Armatosura u kanë ardhur në ndihmë forcave zjarrfikëse në disa bashki të vendit, ku janë evidentuar disa vatra zjarri. Deri më tani 10 vatra mbeten aktive, por nën monitorim dhe nuk paraqesin asnjë rrezik për qytetarët. Ndërkohë që 3 vatra janë shuar në qarkun e Dibrës.

Qendra Kombëtare Operacionale e Mbrojtjes Civile bën me dije se në Lezhë janë aktive 4 vatra zjarri, në njësinë administrative Shëngjin, zona Rëra e hedhur-Maja e Zezë dhe po punohet për izolimin e tyre. Zjarri në malin e Kakarriqit është izoluar pothuajse totalisht. Ndërsa në Rubik, në fshatin Katund i Vjetër, vatra ka intensitet të ulët dhe është nën monitorim. Në Elbasan ka patur një vatër zjarri në Gramsh në fshatin Siman. Policia ka nisur hetimin për shkaqet e zjarrit. Në Fier nga 3 vatra, 2 tashmë janë lokalizuar dhe janë drejt përmirësimit. Situata është nën kontroll edhe në fshatin Hekal në Mallkastër, ku u raportua për zjarr në sipërfaqe me shkurre ullishte dhe pemtari. Vështirësi ka paraqitur terreni në njësinë administrative Terpan në pyllin e Ballollit në Berat, por zjarri nuk përbën rrezik për komunitetin, pasi ndodhet larg zonave të banuara.”