Titujt ushtarakë të Dukës së Jorkut dhe patronazhet mbretërore i janë kthyer Mbretëreshës, ka bërë me dije në një deklaratë Buckingham Palace. Princi Andrew, 61 vjeç, gjithashtu do të ndalojë përdorimin e titullit Lartësia e Tij Mbretërore në cilësinë zyrtare, tha një burim mbretëror.
Kjo vjen pasi ai po përballet me një veprim civil amerikan mbi akuzat për sulm seksual - pretendime që ai i ka mohuar vazhdimisht. Një burim i afërt me dukën tha se ai do të "vazhdojë të mbrohet" kundër çështjes së ngritur në Nju-Jork nga Virginia Giuffre.
Pallati Buckingham tha në deklaratë:
"Me miratimin dhe marrëveshjen e Mbretëreshës, përkatësitë ushtarake të Dukës së Jorkut dhe patronazhet mbretërore i janë kthyer Mbretëreshës. Duka i Jorkut do të vazhdojë të mos marrë përsipër asnjë detyrë publike dhe po e mbron këtë çështje si qytetar privat”.
Të gjitha rolet e Princit Andrew i janë kthyer Mbretëreshës me efekt të menjëhershëm dhe do të rishpërndahen tek anëtarët e tjerë të familjes mbretërore, tha një burim, i cili shtoi se çështja ishte diskutuar gjerësisht me familjen mbretërore.
Ashtu si Harry dhe Meghan, Princi Andrew ruan titullin e tij HRH, por nuk do ta përdorë atë në asnjë cilësi zyrtare.
Të enjten, një letër u nënshkrua nga më shumë se 150 veteranë të Marinës Mbretërore, RAF dhe Ushtrisë, duke i kërkuar Mbretëreshës t'i hiqte princit Andrew tetë titujt e tij ushtarakë britanikë.
