Pyetëm instruktoren! 5 mite rreth palestrës që duhet t’i dini patjetër

Kultura e fitnessit është e mbushur me mite dhe mendime të ndryshme, kjo edhe falë ‘speciaistëve’ dhe influencuesve të fitnesit në TikTok. Dhe kur këto opinione shkojnë tek njerëzit, janë të vështira për t'u ndryshuar.

Shpërthimi i ‘Wellness’ si një trend ka ndikuar në shumë ndryshime pozitive: opsione më të shëndetshme në restorante, një fluks palestrash dhe një interes në rritje për kujdesin ndaj vetes. Por, nga ana tjetër, ka hapur gjithashtu portat për informacion – veçanërisht rreth dietës dhe fitnessit – që nuk është gjithmonë më i besueshmi dhe më i sakti. Ka aq shumë informacione që qarkullojnë rreth stërvitjes, sa ndonjëherë është e vështirë të dallosh faktin nga miti.

Ndaj i kërkuam një eksperteje të ndante me ne 5 mitet që dëgjon më shpesh nga klientët e saj. Tila Mecanaj prej 10 vitesh është pjesë e botës së fitnessit, dhe 5 vite që ushtron këtë profesion. Pasi përfundoi studimet në shkollën kombëtare profesionale të sporteve 'Bernardina Qerraxhi', ajo është stërvitur në disiplinën e Atletikës, duke përfaqësuar Shqipërinë brenda dhe jashtë vendit. Ajo ka mbaruar studimet në Universitetin e Sporteve në Tiranë dhe aktualisht është menaxhere dhe instruktore në ‘Trida Fitness’.

1. “Intermittent fasting – (Agjërimi) është zgjidhja e duhur për këdo!”

Intermittent fasting ka fituar shumë popullaritet vitet e fundit për shkak të përfitimeve të tij shëndetësore, por si çdo qasje dietike, ai nuk përqafohet nga të gjithë. As nga instruktorja jonë.

“Duke qenë se Intermittent fasting kufizon kohën e ushqyerjes mund të çojë në konsumim joadekuat të lëndëve ushqyese thelbësore nëse nuk planifikohet me kujdes. Ai mund të ndikojë në nivelet e hormoneve, duke përfshirë insulinën, kortizolin dhe hormonet e tiroides, të cilat mund të kenë ndikime për metabolizmin, nivelet e energjisë dhe shëndetin e përgjithshëm. Po ashtu, ai është një rrezik për çrregullimet ushqimore, pasi mund të çojë në një marrëdhënie jo të shëndetshme me ushqimin.”

Përveç këtyre dy arsyeve, ajo thotë se Intermittent fasting është edhe një potenciali për humbjen e muskujve.

“Periudhat e zgjatura të agjërimit mund të çojnë në humbje të muskujve, veçanërisht nëse nuk merret sasia e duhur e proteinave. Kjo mund të jetë problematike për individët që janë fizikisht aktivë ose që po përpiqen të ndërtojnë apo ruajnë masën muskulare.”

Gjithsesi, ajo thekson se trupi i secilit reagon ndryshe ndaj ‘dietave’ të ndryshme dhe ajo që funksionon për një person mund të mos funksionojë për një tjetër. Faktorë të tillë si mosha, gjinia, niveli i aktivitetit dhe shëndeti i përgjithshëm duhet të merren parasysh para se të nisni Intermittent fasting.

2. “Sumplementet janë të dëmshme!”

Suplementet janë ushqyes shtesë në dietën tuaj, me qëllim maksimalizimin e rezultateve tuaja përkatëse. Ekzistojnë mite se përdorimi i suplementeve shkakton efekte anësore, gjë të cilën instruktore Tila e mohon, duke nënvizuar se çdo gjë që përdoret në tepricë mund të ketë efektet e veta anësore.

“Suplementet proteinike mund të jenë një mënyrë e përshtatshme dhe efektive për të rritur marrjen e proteinave, veçanërisht për individët që kanë vështirësi të plotësojnë nevojat e tyre për proteina vetëm përmes vakteve ushqimore. Suplementet të ndihmojnë në rikuperimin dhe përshtatjen e muskujve pas ushtrimeve intensive. Kur përdoren sipas udhëzimeve, suplementet janë të sigurta. Studime të shumta nga "American Journal of Clinical Nutrition", "Journal of the American College of Nutrition", "British Medical Journal", etj. mbështesin përdorimin e suplementeve për rritjen e masës muskulare, forcës, performancës në aktivitetin fizik, humbjes së peshës dhe ndikime në shëndetin e përgjithshëm, veçanërisht kur kombinohen me stërvitje të rregullt dhe një dietë të ekuilibruar.”

3. “Duhet të ngresh sa më shumë pesha, për të ndërtuar sa më shumë muskuj!”

Nuk është e vërtetë, thotë instruktorja, e cila shton se shumë studime tregojnë se ngritja e peshave relativisht të lehta me shumë përsëritje është po aq efektive në ndërtimin e muskujve dhe forcës sa ngritja e peshave më të rënda për pak përsëritje. Është çështje preference personale.

“Ndërtimi i muskujve kërkon një marrje të mjaftueshme të kalorive dhe makronutrientëve, veçanërisht proteinave. Pa ushqim për të mbështetur riparimin dhe rritjen e muskujve, ngritja e peshave të rënda mund të mos çojë në rezultatin që dëshironi. Muskujt rriten gjatë periudhave të pushimit dhe rikuperimit, jo gjatë seancës aktuale të stërvitjes. Nëse nuk u jepni kohë të mjaftueshme muskujve tuaj të rikuperohen midis stërvitjeve mund të pengoni rritjen e muskujve pavarësisht nga ngritja e peshave të rënda.”-thotë Tila.

4. “Do dobësohem vetëm përmes cardios!”

Për shumë njerëz ushtrimet cardio shihen si mënyra e shenjtë e humbjes së peshës. E dëgjojmë gjithmonë. Dëshironi të humbni peshë? Bëni cardio! Dëshironi të humbni peshë më shpejt? Bëni më shumë cardio! Ushtrimet cardio janë të shumëllojshme, si: aerobi, kickboxing, aerobics, hoola hooping, etj. ashtu si edhe pajisje të ndryshme në palestër, si pista.

Mirëpo, Tila thotë se për humbjen e peshës vetëm cardio nuk mjafton. Ka njerëz që bëjnë deri në dy orë cardio në ditë në përpjekje për të humbur peshë, por sërish nuk shohin rezultat. Pse?

“Seancat e gjata të cardios mund të ndihmojnë për të djegur disa kalori, por ato gjithashtu do t'ju bëjnë të ndiheni të uritur. Mund të pësoni një rënie të sheqerit në gjak pas një seance të gjatë cardio që do ju japë uri dhe në gjendjen e uritur mund të përfundoni duke konsumuar kalori shtesë. Nëse qëllimi juaj është të humbni peshë, seancat e gjata cardio pa ndryshim në dietë nuk do t'ju ndihmojnë. Humbja e peshës lidhet 70 – 80% me dietën dhe 20 – 30% me ushtrime. Por, nuk është e rëndësishme vetëm sasia e kalorive, por cilësia e ushqimit që hani. Kufizimi i kalorive mund të ngadalësojë metabolizmin tuaj dhe të ndalojë humbjen e peshës, kështu që zgjidhni ushqime më të shëndetshme në vend që të vdisni nga uria. Për të ndihmuar në humbjen e peshës, është e rëndësishme të ndërtoni muskuj, sepse muskujt do t'ju ndihmojnë të digjni kalori shtesë gjatë gjithë ditës dhe gjatë gjumit. Cardio nuk ndihmon shumë në ndërtimin e muskujve, dhe shumë cardio ndonjëherë mund të shkaktojë humbjen e muskujve.”

5. “Palestra është efektive vetëm në mëngjes/darkë”.

Dimë dhe lexojmë shumë rreth metabolizmit dhe palestrës, por ende nuk e dimë se cila orë e ditës është më e mira për tu ushtruar. Ka njerëz dhe studime që rekomandojnë stërvitjen vetëm në mëngjes, ka të tjerë që e rekomandojnë vetëm pasdite.

“Askush nuk është stërvitur dhe ka parë mrekullinë në kohën kur është ushtruar që njerëzit të bien dakord për atë që mund të konsiderohet si koha "më e mirë" për tu ushtruar. Më mirë në çfarë kuptimi? Ndihesh më mirë? Djeg më shumë kalori? Ke rikuperim më të shpejtë të muskujve?”- ngre pikëpyetjet Tila.

“Të gjitha këto janë mënyra vërtet të ndryshme për të optimizuar në një seancë ushtrimesh. Edhe pse disa njerëz mund ta fillojnë ditën e tyre me një stërvitje në mëngjes për të rritur nivelet e energjisë, ushtrimi në çdo kohë të ditës ofron të njëjtin përfitim. Në fakt, studimet kanë treguar se zgjimi herët për të ushtruar mund të prishë ritmin tuaj cirkadian, duke ju bërë të ndiheni të lodhur dhe të ngadaltë gjatë gjithë ditës dhe metabolizmi juaj të ngadalësohet. Nuk ka rëndësi nëse ushtrohesh në mëngjes apo në mbrëmje: koha më e mirë për të ushtruar është koha në të cilën mundesh dhe do. Koha më e mirë për njerëzit për të shkruar në palestër do të ishte sa herë që ata të kenë mundësi për të shkuar."-përfundon ajo.