YouTuberi i famshëm, James Stephen “Jimmy” Donaldson, i njohur si MrBeast, ka ngritur diskutime të shumta në internet pas deklaratës së tij se është i gatshëm të blejë TikTok-un për të shmangur ndalimin e aplikacionit në Shtetet e Bashkuara.
Në një postim në X (Twitter), më 13 janar, Donaldson shkroi: “Mirë mirë, do të blej TikTok-un, kështu që nuk ndalohet.” Fillimisht, komenti u duk si një shaka, por YouTuberi me mbi 300 milionë abonentë në platformën e tij e ndoqi deklaratën me një postim tjetër që dukej më serioz.
“Kam pasur kaq shumë miliarderë që më kanë kontaktuar që kur e kam postuar këtë. Le të shohim nëse mund ta realizojmë këtë,” shkroi ai, duke sugjeruar se bisedime me investitorë të mundshëm kanë nisur.
Sipas burimeve të afërta me MrBeast, ekipi i tij po diskuton me disa palë të interesuara për një blerje të mundshme të platformës kineze, e cila përballet me një afat të vendosur nga qeveria amerikane. Nëse ByteDance, kompania krijuese e TikTok, nuk e shet platformën deri më 19 janar, TikTok mund të ndalohet për përdoruesit në SHBA.
Ndërkohë, raportet e fundit sugjerojnë se Kina është në negociata sekrete për t’ia shitur TikTok-un Elon Musk, miliarderit të Tesla-s dhe pronarit të X, i cili ka shfaqur interes për ta zgjeruar portofolin e tij në teknologji dhe media sociale.
Nëse ndalimi hyn në fuqi, TikTok nuk do të jetë më i aksesueshëm në SHBA, duke shënuar një kthesë dramatike për përdoruesit dhe krijuesit amerikanë të përmbajtjes. Kjo ka hapur një debat të gjerë për ndikimin e vendimeve të tilla mbi lirinë e shprehjes dhe industrinë e teknologjisë globale.
