Tensionet mes Brooklyn Beckham, bashkëshortes së tij Nicola Peltz dhe prindërve të tij, David dhe Victoria Beckham, janë bërë sërish temë diskutimi, veçanërisht pas mungesës së çiftit në festimet e 50-vjetorit të David-it. Sipas një burimi për People, konflikti është i gjatë, por jo i pakapërcyeshëm: “David dhe Victoria e duan djalin e tyre dhe do të jenë gjithmonë aty për të. Megjithatë, janë të lënduar nga fakti që Brooklyn nuk ka më asnjë rol në jetën familjare”.
David organizoi tre festa për ditëlindjen e tij: një në vilën familjare në Cotswolds, një në restorantin Cipriani në Miami dhe një darkë në restorantin me tre yje Michelin, Core, në Londër. Në të gjitha këto ngjarje, të pranishëm ishin vetëm tre nga katër fëmijët: Romeo, Cruz dhe Harper. Brooklyn dhe Nicola munguan në të gjitha festimet.
Një nga arsyet e përfolura për këtë distancim është lidhja e re e Romeo-s me modelen Kim Turnbull, e cila më parë kishte pasur një flirt me Brooklyn. Burimet thonë se Brooklyn nuk i beson Kim-it dhe e sheh lidhjen e saj me vëllain e tij si të dyshimtë, çka ka bërë që ai dhe Nicola të shmangin çdo ngjarje familjare ku ajo është e pranishme.
Një tjetër burim i tensioneve është martesa e Brooklyn dhe Nicola-s në vitin 2022. Nicola zgjodhi të veshë një fustan nga Valentino në vend të një krijimi të Victoria-s, duke mos i dhënë asaj asnjë rol në organizimin e dasmës. Kjo është interpretuar nga disa si një shenjë e marrëdhënieve të ftohta mes nuses dhe vjehrrës.
Pavarësisht këtyre tensioneve, burimi thekson se David dhe Victoria janë të pikëlluar për sjelljen e djalit të tyre, por e duan atë dhe do të jenë gjithmonë pranë tij.
