Dashuria ka gjetur një tjetër mënyrë për të shkëlqyer në jetën e futbollistit të Kombëtares shqiptare, Ernest Muçi, dhe partneres së tij prej vitesh, Klea Verri. Dyshja simpatike, që gjithmonë ka ruajtur një profil të moderuar publik, ka vendosur të ndajë një nga lajmet më të bukura: ata do të bëhen prindër për herë të parë.
Në një mënyrë sa elegante aq edhe domethënëse, Klea zgjodhi detin dhe diellin për të shpallur publikisht shtatzëninë. Në një foto të postuar në InstaStory, ajo shfaqet në bikini, në një mjedis veror, duke treguar barkun e rrumbullakosur. Postimi i saj është shoqëruar thjesht me një ikonë të një gruaje shtatzënë dhe një diell, simbolikë e pastër, e ngrohtë dhe plot jetë.
Prej ditësh, ndjekësit e çiftit dhe ndjekësit e kronikës rozë kishin vënë re disa detaje në postimet e Kleas, ku silueta e saj dukej ndjeshëm e ndryshuar.
Ernest Muçi e ka ndarë jetën me Klean prej vitesh. Lidhja e tyre ka kaluar me qetësi, larg rrëmujës së titujve të mëdhenj, duke ndërtuar një raport të qëndrueshëm që tani merr kuptimin më të madh: familjen.
