Pas dekadash spekulimesh, Sarah Jessica Parker ka konfirmuar për herë të parë se në fillim të viteve ’90 ka qenë në një lidhje dashurie me Nicolas Cage. Zbulimi i papritur erdhi më 13 korrik, gjatë një interviste në podcastin “Watch What Happens Live” me Andy Cohen.
Në një moment, moderatori e pyeti drejtpërdrejt:
“Ke pasur një lidhje me Cage?”
Përgjigjja e Parker ishte po aq e drejtpërdrejtë:
“Ehm… po, kam pasur. Po, vërtet kam pasur.”
Cohen reagoi me habi: “Wow, duhet të flasim më shumë për këtë!”
Thashethemet për një romancë mes tyre kishin nisur që në vitet kur të dy u shfaqën në komedinë romantike “Honeymoon in Vegas”, ku luanin rolin e një çifti që përfshihej në aventura të çmendura në Las Vegas. Megjithatë, deri tani, asnjëri prej tyre nuk e kishte konfirmuar publikisht se marrëdhënia kishte kaluar nga ekrani në jetën reale.
View this post on Instagram
Pas deklaratës së Parker, edhe Nicolas Cage vendosi të flasë. Në një prononcim për E! News, ai u shpreh se lidhja nuk funksionoi për një arsye të thjeshtë: nuk i kishte pëlqyer nënës së Sarah, Barbra Forste.
“Më interesonte shumë Sarah. Mbaj mend që një mbrëmje darkuam së bashku me mamanë e saj në Russian Tea Room. Nuk e di nëse ishte për shkak të xhaketës sime të kaltër prej lëkure motoristësh (që e kam ende), apo për shkak të sinuzitit që më bezdiste, por pas asaj mbrëmjeje nuk mora më asnjë mesazh prej saj.”
Pavarësisht asaj ndarje, fati i rezervoi një tjetër histori dashurie Parker-it. Pak më pas, ajo u njoh me Matthew Broderick, dhe siç tregoi në të njëjtin emision:
“Ai ishte thjesht i mrekullueshëm. Pasi kaluam pak kohë bashkë, kuptova se ishte ai njeriu i duhur për mua. Unë isha e para që thashë ‘Të dua’.”
Çifti u martua në vitin 1997 dhe prej atëherë kanë ndërtuar një nga martesat më të qëndrueshme në Hollywood, me tre fëmijë: James Wilkie dhe binjaket Marion e Tabitha.
Ndërkohë, Nicolas Cage, i njohur për jetën e tij sentimentale më të trazuar, u martua për herë të pestë në vitin 2021 me Riko Shibata, me të cilën ka një vajzë të quajtur August Francesca Coppola Cage, lindur në vitin 2022.
