Para disa ditëve, ish-banori i Big Brother Vip dhe moderatori i njohur, Meriton Mjekiqi, së bashku me vëllain e tij u shpallën në kërkim nga Policia e Kosovës, pasi dyshohen për përfshirje në një ngjarje të rëndë.
Burime të besueshme të Sinjalit mësojnë se më 22 korrik 2025, se Meriton Mjekiqi dhe Rinor Mjekiqi, janë arrestuar lidhur me një rast të lëndimit të rëndë trupor, që dyshohet të ketë ndodhur më 11 korrik 2025.
Sipas informatave që posedon Sinjali, të dyshuarit ishin në arrati prej datës së incidentit, por janë paraqitur sot rreth orës 15:00 në Stacionin Policor në Obiliq, ku janë intervistuar në prani të avokatëve mbrojtës.
Ngjarja ka të bëjë me një përleshje fizike ku si pasojë, viktima Egzon Grajqevci ka pësuar lëndime të rënda trupore.
Pas intervistimit dhe procedurave hetimore, Prokurori i Shtetit ka vendosur që ndaj Meriton dhe Rinor Mjekiqit të shqiptohet masa e ndalimit policor prej 48 orësh, thonë burimet e besueshme të Sinjalit.
